भांगरभूंय | प्रतिनिधी
कांता गावडे: आझाद मैदानाचेर मरसर उपासाक बसपाची तयारी
भांगरभूंय । प्रतिनिधी
फोंडें: म्हादयचो विशय गंभीर आसा. गोंयची जीवनदायिनी आशिल्ले म्हादयचें अस्तित्व तिगोवन दवरचे खातीर लोकांनी यत्न करपाची गरज आसा. म्हादयचो विशय दरेका गांवांनी भोंवून लोकांक समजावन सांगपाचो यत्न करतले. लोकांनी जागरूक रावन म्हादयच्या आंदोलनाक तेंको दिवचो, असो उलो कांता गावडे हांणी मारलो.
वेलींग- प्रियोळचे लोककलाकार कांता गावडे हांच्या घरा म्हादय प्रस्नाचेर विचार करचे खातीर आपयिल्ले बसकेंत कांता गावडे उलयताले. हे बसकेंत पत्रकार, लेखक, कवी आनी कलाकारांनी चर्चा करून चळवळ ‘आमची म्हादय आमकां जाय’ नांवा खाला सुरू करपाचो निश्चेव केलो.
म्हादय न्हंयेचें अस्तित्व तिगोवन दवरचे खातीर राज्य सरार विशय मांडपाक अपेशी थारता. म्हादयच्या संरक्षणा खातीर आमी गरज पडल्यार आझाद मैदानाचेर मरसर उपासाक बसतले, अशी घोशणा कांता गावडे हांणी ह्या वेळार केली.
हे बसकेंत पत्रकार राजू नायक, प्रकाश नायक, रामकृष्ण जल्मी, राजेंद्र काकोडकार, एन. शिवदास, अँथोनी वाझ, मधुसुदन बोरकार, दिलीप बोरकार, आविता बांदोडकार, शशिकांत सांवड्डेंकार, अजय बुवा आनी हेर मानेस्त हाजीर आशिल्ले. पत्रकार राजू नायक हांणी सांगलें, गोंयांत आयज फक्त मतदार उरल्यात. राजकारणी लोकांक लागून म्हादयचो प्रस्न फाटल्या कितल्याशाच वर्सां सावन प्रलंबीत आसा. म्हादय न्हंयेचें उदक कर्नाटक राज्यांत घुंवडायता हाची पुराय म्हायती मुख्यमंत्री डॉ. प्रमोद सावंत हांणी हे आदींच केंद्रांतल्या मंत्र्यांक दिल्ली. ताका लागून म्हादयचो प्रस्न फक्त विचारवंत, साहित्यीक, लेखक, कवी आनी कलाकारूच योग्य तरेन हाताळपाक शकतात.
‘गोंय मुक्ती खातीर राजकारण्यांचें योगदान शुन्य’
केंद्राच्या चेपणाक लागून गोंयांतले फुडारी म्हादय संबंदांत कांयच उलोवचे नात. गोंय मुक्ती खातीर लेगीत स्वातंत्रसैनिकां वांगडा लेखक, कवी आनी कलाकारांनी म्हत्वाचें योगदान दिलां. मात राजकारण्यांनी गोंय मुक्ती खातीर योगदान दिवंक ना. ताका लागून म्हादय प्रस्नाचेर आवाज काडपाक हेर सगळ्या संस्थांनी संघटीतपणान लढो दिवपाची गरज आसा, अशें राजू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
