म्हादयची लडाय आमीच जिखतले

भांगरभूंय | प्रतिनिधी

मुख्यमंत्री डॉ. प्रमोद सावंतः भाजपा कार्यकारणीचे बसकेंत साबार विशयांचेर चर्चा

भांगरभूंय । प्रतिनिधी

वास्कोः म्हादय प्रस्ना संबंदांत आतां महाराष्ट्र सरकाराचोय तेंको मेळिल्ल्यान आमची बाजू अदीक घटमूट जाल्या. ताका लागून म्हादयची लडाय आमीच जिखतले, हाची आपल्याक खात्री आसा, अशें मुख्यमंत्री डॉ. प्रमोद सावंत हांणी सांगलें.

भाजपा कार्यकारणीची वास्को आयतारा बसका जाली. हे बसकेंत घेतिल्ले विवीध थाराव, विवीध विशयां वयली चर्चा आनी हेर म्हायती दिवचे खातीर पत्रकार परिशद घेतिल्ली. त्या वेळार मुख्यमंत्री डॉ. सावंत उलयताले. ह्या वेळार भाजपा प्रदेशाध्यक्ष सदानंद तानावडे, पंचायत मंत्री मॉवीन गुदिन्हो, वास्कोचे आमदार कृष्णा साळकार, मुरगांवचे आमदार संकल्प आमोणकार, आदले खासदार ॲड. नरेंद्र सावयकार, आदले आमदार दामू नायक हाजीर आशिल्ले.

म्हादय आमच्या काळजांत आसा. ती आमकां प्रीय आसा. ते नदरेन कायदेशीर, राजकी, तंत्रीक नदरेन राज्य सरकार हे बाबतींत सगळे वटेंतल्यान नेमान काम करता. सगळ्या आमदारांचो आस्पाव आशिल्ली सभाघर समिती नेमान फाटपुरवण करतली. ती सर्वसमावेशक समिती काडिल्ल्यान तांकां जी म्हायती आसा ती तांणी दिवची. आमी सभाघर समिती काडिल्ल्यान सरकाराचे हात घटमूट जाल्यात, अशें मुख्यमंत्री डॉ. सावंत हांणी सांगलें.

मुरगांव म्हालांत मंत्री गुदिन्हो हांचे सयत साळकार आनी आमोणकार अशे तीन आमदार आशिल्ल्यान भाजपाची शक्त वाडल्या. जे. पी. नड्डा हांचे अध्यक्षते खाला 2024ची लोकसभा वेंचणूक लडयतले. ते नदरेन बसकेंत चर्चा जाली. केंद्र आनी राज्य सरकाराच्यो विवीध येवजण्यो अंत्योदया मेरेन पावोवपा खातीर कार्यकर्त्यांनी दरेकल्या कडेन संपर्क करपाक जाय. कार्यकर्त्यां मदीं उमेद आशिल्ल्यान ते दरेकल्या कडेन संपर्क करपाक तयार रावल्यात, अशें मुख्यमंत्री डॉ. सावंत हांणी सांगलें.

हे बसकेंत भारत आनी स्वयंपूर्ण गोंय आनी घटमूट करपाचो तशेंच तरणाटे आनी बायलो हांकां रोजगार कुशळटाययुक्त करपाचेर भर दिवपाचो निर्णय घेतलो. आमदार, कार्यकर्त्यां वरवीं सरकारी येवजण्यो लोकां मेरेन पावोवपाचो निश्चेव केला, अशीय म्हायती मुख्यमंत्री डॉ. सावंत हांणी दिली.

भाजपा प्रदेशाध्यक्ष सदानंद तानावडे हांणी सांगलें, हे बसकेक मुख्यमंत्री डॉ. सावंत हांचे सयत केंद्रीय मंत्री श्रीपाद नायक, केंद्रीय म्हायती आनी तंत्रज्ञान राज्यमंत्री राजीव चंद्रशेखर, राज्यसभा खासदार विनय तेंडुलकार, तशेंच गोंयचे हेर मंत्री, भाजपाचे प्रदेश पदाधिकारी हाजीर आशिल्ले. राजकी, समाजीक आनी अर्थीक विशयांचेर बसकेंत चर्चा जाली. हे संबंदांत कांय म्हत्वाचे निर्णय घेतले.

केंद्र सरकाराच्या गरीब कल्याण येवजणे संबंदांत बसकेंत आदले आमदार दामू नायक हांणी म्हायती दिली.

भाजपा महिला मोर्चा, युवा मोर्चा आनी हेर मोर्चांच्या अध्यक्षांनी संबंदीत म्हायती हाजीर आशिल्ल्यांक दिली. 27 जानेवारीक प्रधानमंत्री नरेंद्र मोदी विद्यार्थ्यां कडेन चर्चा करतले. ते संबंदांत गोविंद पर्वतकार हांणी म्हायती दिली. केंद्र सरकाराच्या विवीध येवजण्यां संबंदांत मॉवीन गुदिन्हो, सुभाष फळदेसाय, गोविंद गावडे, निलेश काब्राल, रोहन खंवटे हांणी मार्गदर्शन केलें. राजीव चंद्रशेखर हांणीय हाजीर आशिल्ल्यांक मार्गदर्शन केलें. लोकसभेच्यो दोनूय सुवातो भोवमतांनी जिखपाचो निश्चेव बसकेंत केलो. गोंय सरकारान आतां मेरेन केल्ल्या उदरगतीच्या कामां संबंदांत बसकेंत चर्चा केली. मनोहर आंतरराष्ट्रीय विमानतळ, जुवारीचो नवो पूल, देवदर्शन यात्रे संबंदांत लेगीत बसकेंत चर्चा केली.

‘म्हादय सांबाळपाची कळकळीची विनवणी’

गोंयची जीवनदायिनी आशिल्ले म्हादय न्हंये संबंदांत कर्नाटकाच्या डीपीआराक केंद्रीय जल आयोगान मंजुरी दिल्या. ताका लागून न्हंयेच्या अस्तित्वाक धोको निर्माण जाला. ताका लागून म्हादय न्हंयेच्या उदका वयले गोंयचे कायदेशीर हक्क आन हीत सांबाळपा खातीर गरजेचीं सगळीं पावलां उखलचे खातीर बसकेक  हाजीर आशिल्ल्यांनी राज्य सरकाराक कळकळीची विनवणी केली.