भांगरभूंय | प्रतिनिधी
गोंयचे पर्यावरण मंत्रालयाक पत्र
पणजीः केंद्रीय जल आयोगा कडल्यान डीपीआराक मंजुरी मेळ्ळे उपरांत कर्नाटकान कळसा-भांडुरा प्रकल्पा खातीरचे परवाने मेळोवपाक केंद्रीय रान पर्यावरण आनी हवामान बदल मंत्रालया कडेन परवाने मेळोवपाक यत्न चलयल्यात. पूण गोंय सरकारान फाटल्या शुक्रारा मंत्रालयाक पत्र बरोवन कर्नाटकाक कसलेच परवाने दिवचे न्हय, अशी मागणी केल्या.
म्हादय विशींची सुनावणी बेगोबेग घेवची, अशी मागणी करपी अर्ज गोंय सरकारान फाटल्या शुक्रारा सर्वोच्च न्यायालयांत केल्या. तेच दिसा उदकास्रोत खात्याच्या सचिवांनीय केंद्रीय रान, पर्यावरण आनी हवामान बदल मंत्रालयाक पत्र बरोवन सर्वोच्च न्यायालयाचो निमाणो निकाल येमेरेन कळसा-भांडुरा प्रकल्पा विशींचे कर्नाटकाक कसलेच परवाने दिवचे न्हय, अशी मागणी केल्या, अशी म्हायती अॅडव्होकेट जनरल देविदास पांगम हांणी दिली.
मजगतीं, डीपीआराक मंजुरी मेळ्ळे उपरांत म्हादयच्या कळसा उपन्हंयेचेर उबारपी धरण प्रकल्पा खातीर कणकुंबी, पारवड, बेटणें, कालमणी अशा वाठारांतल्या 26,9255 हेक्टर रानक्षेत्र प्रकल्पा खातीर वापराक कर्नाटकान दिल्ल्या प्रस्तावाचेर पर्यावरण मंत्रालयान 5 जानेवारी 2023 दिसा कर्नाटका कडल्यान गरजेचो तपशील मागिल्लो. ते प्रमाण कर्नाटकान पयल्या टप्प्यांतल्या परवान्या खातीर लागपी गरेजेचीं म्हायती 14 जानेवारी 2023 दिसा मंत्रालयाक सादर केली. ताका लागून फुडल्या कांय दिसांत कर्नाटकाक पयल्या टप्प्यांतले पर्यावरण परवाने मेळपाची शक्यताय निर्माण जाल्या.
हुबळी-धारवाड ह्या शारांक उदका पुरवण करपाक कळसा प्रकल्प उबारपा खातीर कर्नाटकान म्हादय जलतंटो लवादाच्या निर्णया उपरांत सुदारीत डीपीआर तयार करून तो केंद्राक सादर केला. ह्या प्रकल्पा खातीर कर्नाटका कडल्यान सध्या झुजा पांवड्यार यत्न सुरू आसात.
पयलीं कळसा प्रकल्पा खातीर 33.0507 हेक्टर रानक्षेत्र लापाचे आशिल्ले. तातूंत बदल करून ह्या प्रकल्पा खातीर 26.9255 हेक्टर रानक्षेत्राची गरज आशिल्ल्याचे कर्नाटकान नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
