भांगरभूंय | प्रतिनिधी
पेडणें/ कोरगांव: निलावडे- सिंधुदुर्गाच्या एका पेशंटाक सावंतवाडी हॉस्पिटलांतल्यान बांबोळे व्हरतना धारगळ- महाखाजन वाठारांत मध्यानरातीं तीन वरांचेर शॉर्टसर्कीट जावन एम्बुलन्स लासपाची घडणूक घडली.
एम एच १४ सी एल ०५५४ ही एम्बुलन्स सावंतवाडीच्यान वेगान बांबोळे वतना गाडयेंत स्पार्क आयिल्ल्याचें ड्रायव्हराच्या लक्षांत आयलें. ताणें गाडी रोखडीच कुशीक घेतली. पेशंट आनी हेरांक दुसरे गाडयेन पणजे धाडून दिलीं. उजो पालोवपी दळाक म्हायती दिली. उपरांत एम्बुलन्सीन पेट घेतलो.
घडणुकेची म्हायती पेडणें उजो पालोवपी दळाक मेळटाच तांणी घडणुके सुवातेर धांव घेतली आनी उजो नियंत्रणांत हाडपाचो यत्न केलो. हातूंत फायर फायटर जयराम शेटगांवकार, अल्वारीस मास्कारेन्हास, जयराम कानोळकार, इंद्रकुमार परब, कृष्णा नायक आनी बया वरक ह्या जवानांनी उजो नियंत्रणांत हाडलो. गाडी पुरायेन लासून गेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
