भांगरभूंय | प्रतिनिधी
साळ न्हंये कुशीक मडगांव पालिकेचे ट्रक उडयतात कोयर
मडगांव, प्रतिनिधी: मडगांव पालिकेचो ट्रक साळ न्हंयेच्या पात्रा सावन कांय अंतराचेर वेस्टर्न बायपास लागसारच्या रस्त्या कुशीक कोयर उडयतना नदरेक पडलो. मडगांव पालिका कार्यालयान आपणाक कोयर उडोवपाच्यो सुचवण्यो दिल्यात, अशें ट्रक चालकान म्हणलें. बाणावलेच्या समाजीक कार्यकर्त्यांनी हो विशय उक्ताडार हाडलो. बाणावली आमदारां सयत पंचायती कडल्यान हाची दखल घेवन दोशींचेर कारवायेची मागणी केली.
बाणावलेचे समाजीक कार्यकर्ते रॉक फर्नांडीस हांणी मिस्तुराद कोयर हाडून उडयता हें उक्ताडार हाडिल्लें. साळ न्हंय पसून कांय अंतराचेर आनी जंय वेस्टर्न बायपासाचें काम सुरू आसा थंय कोयर उडोवपाचें काम चालू आसा. ते सुवातेर व्हडा प्रमाणांत प्लास्टीक, नाल्लाचीं सोण्णां असो कोयर उडयतात. गोंय प्रदूशण नियंत्रण म्हामंडळाची हाका परवानगी ना. तरीय न्हंयेच्या लागसारा हो कोयर उडयता. उदकाचें प्रदुशण जांव येता, तरीय हांगा कोयर हाडून कसो उडयतात, असो प्रस्न रॉक फर्नांडीस हांणी केलो. तशेंच कोयर उडोवपी ठेकेदाराचेर गुन्यांव नोंद करपाची गरज उक्तायल्ली.
आमदार व्हेंझी व्हिएगस आनी सरपंच झेविअर परेरा हांणी घडणुके सुवातेर वचून पळोवणी केली. परवानगी नासतना असो इतल्या व्हडा प्रमाणांत कोयर उडयलो असो प्रस्नूय विचारलो.
पालिके आड कागाळ करतलेः बाणावली सरपंच
वेस्टर्न बायपासाचें काम सुरु आशिल्ले सुवातेर पंचायत वा खंयचेय थळावे स्वराज्य संस्थेचे परवानगे बगर मडगांव पालिकेन आपल्या वाठारांतलो कोयर हाडून बाणावले उडयला. तांणी कोयर हांगच्यान काडचो. हो कोयर उडयल्ले खातीर पंचायत पुलिशेंत कागाळ करतली. हाका वेस्टर्न बायपासाचें काम करपी अधिकारीय दोशी आसात. परवानगी नसतना कोयर उडोवपाक तांणी दिवचो न्हय, अशें बाणावली सरपंच झेविअर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
