भांगरभूंय | प्रतिनिधी
वास्को-बायणा दोन गटां मदीं जाल्ली मारपेट
मुरगांव: सोमारा (ता. 16) मध्यान रातीं वास्को बायणा हांगा जाल्ल्या दोन गटां मदले मारपेटींत राजकी मोडण मेळ्ळां. वास्को मांगोरहील आनी बायणा वाठारांतल्या दोन गटांतली मारपेट मुरगांव पालिकेच्या प्रभाग 12 त जाल्ली. हे मारपेटींत म्हज्या प्रभागांतल्या लोकांचो कसलोच संबंद ना. तशेंच हे मारपेटींत म्हज्या प्रभागांतलो एकूय मनीस नाशिल्लो. असो खुलासो वास्को भाजप गट अध्यक्ष आनी गोवा मनीस संसाधन विकास मंडळाचे उपाध्यक्ष दीपक नायक हांणी केला. हे प्रकरण गंभीरतायेन घेवन संबंदितांचेर कारवाय करची अशी मागणी करपी निवेदन नगरसेवक दीपक नायक हांणी उपअधिक्षक शेख सलीम आनी निरिक्षक कपील नायक हांकां दिलां.
सोमारा मध्यान रातीं बायणा आनी मांगोरहील हांगासरल्या तरणाट्यां मदीं मारपेट जाली. उपरांत प्रकरण वास्को पुलीस स्टेशनार येतकूच थंय दोन लोकप्रतिनिधी आपआपल्या समर्थकां सयत दाखल जाले. हाका लागून ह्या प्रकरणाक राजकी मोडण मेळ्ळां. हे मारपेटींत एकल्याक गंभीर स्वरुपाची दुखापत जाल्ल्यान ताका उपजिल्हो हॉजस्पिटलांत उपचारा खातीर दाखल केला. उपरांत वास्को पुलिसांनी कांय दुबावितां आड गुन्यांव दाखल केलो.
हे मारपेटीक लागून आपआपल्या समर्थकांक तेंको दिवपा खातीर पुलीस स्टेशनार दाखल जाल्ल्या लोकप्रतिनिधीचो विशय वास्कोंत चर्चेचो विशय जाला. तशेंच समर्थकांक तेंको दिवपा खातीर रातीं 1.30 वरांचेर लोकप्रतिनिधी गेल्ल्यान हें प्रकरण चडूच गाजत आसा.
वास्को बायणा प्रभाग 12 त सोमारा मध्यान रातीं जाल्ले मारपेटींत ह्या प्रभागांतल्या कोणाचोय वांटो नाशिल्ल्याची म्हायती वास्को भाजपा गट अध्यक्ष दीपक नायक हांणी दिली. तशेंच हे मारपेटींत प्रभाग 12 मदलो एकूय नागरीक नाशिल्लो असो खुलासो नायक हांणी केला.
मध्यान रातीं पुलीस स्टेशनार वचून पुलीस आनी हेरांक त्रास करप चुकीचें आशिल्ल्यान सबंदितांचेर कारवाय जावप गरजेची आसा. पुलिसांच्या कामांत हस्तक्षेप करप हें लेगीत कायद्यान गुन्यांव आसा. जर पुलिसांचेरूच चेपण हाडलें जाल्यार फुडारांत सर्वसामान्य लोक न्याया खातीर खंय वतले असो प्रस्न नायक हांणी उपस्थीत केलो.
वास्को, मुरगांव, दाबोळी आनी हेर वाठारांनी पुलिसांनी रातची गस्त घालची. तशेंच सर्वसामान्यां खातीर काम करपी पुलिसांचेर राजकी चेपण हाडचें न्हय अशें दीपक नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
