भांगरभूंय | प्रतिनिधी
माजरां सुण्यां इतलींच इमानदार आसूंक शकतात, अशें हांवें सांगलें जाल्यार तुमी कितें म्हणटलीं? म्हजीं एक, दोन, तीन, चार न्हय तर एकूण 10 माजरां आसात. हय ! तुमी सारकें वाचलां. तीं म्हजीं सगळ्यांत बरीं इश्ट आनी सगळ्यांत व्हडले ‘स्ट्रेस बस्टर’. बालसाहित्यीक लेवीस कॅरोलाचें एक वाक्य हांव खूब मोलादीक मानतां. ‘तुमच्या घरांत माजर आसल्यार मोग, हांसप आनी इश्टागतीन सदांच आशिर्वाद मेळटलो’. हांव माजरां बरोबर व्हड जाल्ल्यान तें म्हज्या जिविताक लागू जाता. तीं म्हज्या जिवितांत कशीं आयलीं? हें जाणून घेवपाक काणयेंत बुडचें पडटलें.
माजराची आवड आशिल्ल्या शेजाऱ्या कडल्यान सगलें सुरू जालें. गांवांतल्या चडशा लोकांक ताची माजराची आवड खबर आशिल्ली आनी आमचीं घरां मुखेल रस्त्या लागसार आशिल्ल्यान कांय जाणांनी ह्या दोन अनुकूल परिस्थितीचो व्हड फायदो घेतलो. आमच्या घरा लागसार कांय माजरांक वाट चुकोवन सोडलीं. म्हज्या शेजाऱ्याक माजरांची काकुळट आयली आनी ताणें आपली भुरगींच कशी तांची काळजी घेतली. ल्हान आसतना हांव म्हज्या शेजारी आनी माजरां मदलें सोबीत बंधनाची तोखणाय करीत वाडलें. निमाणें म्हाकाय माजरांची आवड निर्माण जाली. पयलेच नदरेन म्हाका तांचो मोग जालो.
काळजाहीन जावन लोकांनी माजरांक भटकून सोडलीं तरी हांवें तांकां म्हजें स्वताचें कुटुंब कशीं वागयलीं. माजर आनी म्हजे मदलो संबंद खूब वेगळो. खाशेलो. शाळेंत आसतना जेवणा वेळार घराचे बाल्कनींत माजरां म्हजी वाट पळयनासलीं, असो एकूय दीस आसचो ना. आवयच्या भंयान तातुंतल्या कोणाकूच घरांत भितर सरपाचें धाडस जालें ना, पूण एकदां हांव घरांत सरलें म्हणटकीच घरांत सगले कडेन ‘म्याऊ, मांऊं’ करपी माजरांचो हुंवार येतालो.
म्हजीं माजरां सगळ्यांत बरीं. कारण तीं म्हाका आनी म्हज्या कुटुंबा सवे इमानी सिद्ध जाल्यांत. आमी सरपटपी जिवां पसून आनी किड्यां पसून वाटावल्यात. हालींच म्हज्या बिबट्यांनी आनी तांचे आवय माजरान म्हजे आवयक एका विखारी जिवाण्या पसून वाटायल्या. नशीबान तांच्या संरक्षणाक लागून आमी तो सोरोप धरून परतून रानांत सोडपाक शकलीं.
हांव केन्नाय व्यस्त दिसल्यार आनी हांवें माजरां कडेन दुर्लक्ष केल्यार तीं म्हजें लक्ष शक्य तितल्या तरांनी ओडून घेवपाचो यत्न करतात. देखीक, हांव अभ्यास करतना तीं म्हाका जाप करपाक येतात. आडनदर केल्यार अभ्यासाच्या मेजाचेर चडपाचो यत्न करतात. तरीय लक्ष दिलें ना जाल्यार म्हज्या लॅपटॉपाचेर येतात. एकसारकीं ‘म्याऊं, म्याऊं’ करीत रावतात.
खंयच्याय वेळार म्हज्या घराक भेट दिल्यार वा फोन केल्यार तीं म्हजे भोंवतणीं आवाज करीत भोंवतात, हें तुमकां दिसतलें. आमी एकठांय जेवतात आनी खेळटात लेगीत. तांकां कपडे शिंवपाक आनी तांचे मेकओवर करपाक म्हाका खूब आवडटा. कोणाचोय मोग करताना त्या मोगाळ मनशा कडेन उलयतना आवाज आनी स्वर बदलपाची प्रवृत्ती आसता. म्हज्या माजरां लागीं उलयतना म्हजे बाबतींत तेंच घडटा. आमचे कडेन एक मजेशीर भास आसा, जी फकत म्हज्या माजरांक समजता आनी तीं रोखडींच प्रतिसाद दितात.
जेन्ना म्हाका एकसुरेपण, ताण वा रडपाची इत्सा जाता तेन्ना एक वा दुसरें माजर खंयच्यान तरी उडकी मारून म्हजे मांडयेर बसता आनी कुरकुर करता. हाकाच लागून हांवें वयर तांकां ‘स्ट्रेस बस्टर’ म्हणलां. माजर 66 टक्के जिवीत न्हिदेंत घालयतात. हें एक तथ्य. देखून तांच्या आळशीपणाची कागाळ करपाक मेळना. बरें, तें पुरो जायना; दर दिसाचो 30 ते 50 टक्के वेळ तीं स्वताची नितळसाण आनी ग्रुम करपाक घालयतात. सध्या म्हजे धा माजर इश्ट, इश्टीणी आसात. पूण तातूंतलें एखादें रस्त्यार अपघात जावन वा हेर कारणान गेलें, जाल्यार लोकांनी सोडिल्लीं दुसरीं माजरा मेळटात. म्हज्या माजरांनी दिल्ल्यो यादीं आनी खीण अविस्मरणीय आसात, हातूंत दुबाव ना.
हांव निमाणे एक ल्हानसो संदेश दितां. ‘आमी आमच्या भुरग्यां प्रमाण पाळीव जनावरांक सांबाळूंक जाय. तांकांय भावना आसात. तांची काळजी घेवपाक कळना जाल्यार तीं पोसूंक फावना. तांकां पयस व्हरून सोडपा परस तें बरें.’
वालांका जिल्डा रिबेलो
8007184456
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
