भांगरभूंय | प्रतिनिधी
पाळें – शिरदोणा मेगा प्रकल्पा आड बसका
पणजी : म्हजें घर उरपाक जमनी गोंयकारांच्या ताब्यांत आसप गरजेचें. दिल्लीकारांनी गोंयांत येवन जमनी विकत्यो घेतल्यो आनी शेतजमनींचें रूपांतरण जाल्यार कोणाकूच म्हजें घर बांदप शक्य जावचें ना. म्हजें घरा परस जमनी ताब्यांत उरप गरजेचें, अशें आरजीचे मुखेली मनोज परब हांणी म्हणलें.
पाळे – शिरदोणा मेगा प्रकल्प आनी जमीन रूपांतरणा आड बसका जाली. पाळें हांगच्या सांतेरी देवळा वाठारांत ही बसका सभा जाली. आमचो गांव आमकां जाय, दोंगोर राखुया, गांव सांबाळुया, वी वॉन्ट ग्रीन गोवा अशे तक्टे घेवन ग्रामस्थ निशेध सभेक हाजीर रावले. आरजीचे मुखेली मनोज परब, आरजीचे आमदार विरेश बोरकार आनी ग्रामस्थूय हाजीर आशिल्ले.
भाजप सरकारान म्हजें घर येवजण सुरू केल्या. सध्या बिगर गोंयकार व्हडा प्रमाणांत जमनी विकत्यो घेतात. दोंगोर कापपा वांगडा व्हडा प्रमाणांत जमनीचें रूपांतर जाता. जमीन रूपांतर हो पांच हजार कोटींचो घोटाळो. शिरदोण – पाळेंच्या मेगा प्रकल्पां खातीर जमनींचें रूपांतरण जाता. जमनीचें दर मळबाक तेंकिल्ल्यान गोंयकारांक घर बांदप सध्या अशक्य जालां. हे स्थितींत म्हजें घर येवजण हो भाजप सरकाराचो एक इव्हेंट. फाल्यांच्यान येवजणेचे अर्ज वाटपाचो इवेंट सुरू. म्हजें घर येवजणे परस गोंयकारांनी जमनी वाटावपा खातीर लढो उबारपाक जाय, अशें मनोज परब हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
