भांगरभूंय | प्रतिनिधी
इंडीयन प्रिमीयर लीग (आयपीएल) 2024चे पावणे खातीर भारतीय क्रिकेट नियामक मंडळान (बीसीसीआय) खेळगड्यांची वळेरी जाहीर केल्या. हे वळेरेंत गोंयचो अश्टतासांचो खेळगडो मोहीत रेडकार आनी बॅट्समन दर्शन मिशाळ हांची निवड केल्या.
बीसीसीआयन आयपीएलाच्या फुडल्या हंगामाचे पावणे खातीर वेंचिल्ली खेळगड्यांची वळेरी जाहीर केली. संवसारांतल्या 333 खेळगड्यांचीं नांवां निश्चीत केल्यात. हे खेपे पावणेंत चडांतचड 77 खेळगड्यांचीच विक्री करपाक मेळटली. तातूंतल्यो 30 सुवातो विदेशी खेळगड्यां खातीर आसात. पावणी दुबय जातली. 19 डिसेंबराक भारताच्या वेळा प्रमाण दुपारां 2.30 वरांचेर पावणेक सुरवात जातली.
गोंयच्या मोहीत रेडकारान गोंया खातीर रणजी सयत हेर सर्तींनी लेगीत उत्कृश्ट प्रदर्शन करून सगल्यांचें लक्ष आपले वटेन ओडून घेतलां. हालींच सोंपिल्ले बीसीसीआयचे 23 वर्सां पिराये सकयले आंतरराज्य वन डे क्रिकेट सर्तींत मोहीत रेडकारान क्रिकेट लिगेच्या अखील भारतीय बॉलिंग रॅंकिंगेंत पयली सुवात मेळयिल्ली. हरयाणांत जाल्ले हे सर्तींत ऑफ स्पिनर मोहीत रेडकारान स मॅचींतल्या पांच डावांनी बॉलींग करतना सगल्यांत चड 20 विकेटी घेतिल्ल्यो.
दुसरे वटेन दर्शन मिशाळान लेगीत आपल्या प्रदर्शना वरवीं सगल्यांक प्रभावीत केलां. हालींच जाल्ले विजय हजारे क्रिकेट सर्तींत गोंयचें प्रतिनिधित्व करतना दर्शनान लेगीत उत्कृश्ट प्रदर्शन केल्लें. गोंयचो पंगड सर्तींत विशेश प्रदर्शन करपाक शकलो नासलो तरी दर्शनान सगल्यांक प्रभावीत केल्लें.
हाचे आदीं आयपीएलांत गोंया वतीन स्वप्नील अस्नोडकार, शादाब जकाती हांणी उत्कृश्ट प्रदर्शन केलां. जाल्यार सुयश प्रभुदेसाय हो सध्या रॉयल चॅलेंजर्स बंगळुरुच्या पंगडांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
