भांगरभूंय | प्रतिनिधी
दोन उपमुख्यमंत्री; शिवराज सिंह चौहानाचो राजिनामो
खबरां संस्था
भोपाळः मध्यप्रदेशाचे फुडले मुख्यमंत्री मोहन यादव आसतले. मोहन यादव हे उज्जैन दक्षीणेचे आमदार. भोपाळच्या भाजपाच्या प्रदेश कार्यालयांत पक्षाच्या विधीमंडळ पक्षाचे बसकेंत तांच्या नांवाक मंजुरी दिली. मोहन यादव हे ओबीसी वर्गांतल्यान येतात. जगदीश देवरा आनी राजेंद्र शुक्ला हे दोन उपमुख्यमंत्री आसतले. नरेंद्र सिंह तोमर हे सभापती आसतले. बसकेक निरिक्षक मनोहर लाल खट्टर (मुख्यमंत्री हरियाणा), डॉ. के. ल7मण (राष्ट्रीय अध्यक्ष, भाजपा ओबीसी मोर्चा) आनी आशा लकडा (राष्ट्रीय सचीव भाजपा) हाजीर आशिल्ले. विधीमंडळ पक्षाचे बसके आदीं भाजपाच्या वरिश्ठ फुडाऱ्यांची बसका जाली.
मुख्यमंत्री म्हूण आपल्या नांवाची घोशणा जाले उपरांत मोहन यादव हांणी सांगलें, आपूण पक्षाचो ल्हान कार्यकर्तो. आपल्याक दिल्ल्या मोगा खातीर तेंक्या खातीर राज्य नेतृत्व आनी पक्षाच्या केंद्रीय नेतृत्वाचें मनाकाळजा सावन उपकार. आपूण आपली जापसालदारकी प्रामाणीकपणान सांबाळटलों.
नव्या मुख्यमंत्र्यांच्या नांवाची घोशणा जाले उपरांत शिवराज सिंह चौहान राजभवनाचेर गेले. थंय तांणी मुख्यमंत्रीपदाचो राजिनामो राज्यपाल मंगूभाई पटेल हांचे कडेन दिलो. तांचो राजिनामो तत्काळ मंजूर केलो. मुख्यमंत्री पदार आपल्या नांवाची घोशणा जाले उपरांत मोहन यादव राजभवनार गेले. थंय तांणी राज्यपाल पटेल हांची भेट घेवन सरकार स्थापनेचो दावो केलो. ह्या वेळार तांचे वांगडा शिवराज सिंह चौहान, नरेंद्र सिंह तोमर, कैलाश विजयवर्गीय, प्रल्हाद पटेल आनी व्ही. डी. शर्मा हाजीर आशिल्ले. तशेंच तीन निरिक्षक मोहन लाल काथार, डॉ. के. लक्ष्मण आनी आशा लकडा लेगीत वांगडा आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
