भांगरभूंय | प्रतिनिधी
मोरोक्को, खबरां संस्था : शुक्रारा रातीं उसरां मोरोक्को देशांत जाल्ल्या भुंयकांपांत आतां मेरेन 2 हजारां परस चड लोकांक मरण आयलां. 1400 परस चड लोक गंभीर जखमी जाल्ल्याची म्हायती मेळ्ळ्या. राजा मुहंमद सवो हांणी तीन दीस राश्ट्रीय शोक जाहीर केला. तांणी भुंयकांप पिडेस्त लोकांक जेवण, आलाशिरो आनी हेर मजत दिवपाचो आदेश दिला.
भुंयकांपाची तांक 7.2 रिश्टर आशिल्ली. 120 वर्सांतलो ह्या वाठारांतलो हो सगळ्यांत बळिश्ट भुंयकांप.
मोरोक्कोच्या सरकारी दूरचित्रवाणीन, ह्या भुंयकांपाक लागून जायत्यो इमारती कोसळ्ळ्यात अशें सांगलां. ह्या भुंयकांपाचें केंद्र माराकेश शारा पसून 70 किलोमीटर अंतराचेर ऍटलास पर्वता लागसारा आशिल्ल्या इघिल गांवांत आशिल्ल्याचें अशें सांगलां. भुंयकांपाची खोलाय जमनीपोंदा 18.5 किलोमीटर खोल आशिल्ली. पुर्तुगाल आनी आल्जेरिया मेरेन हो भुंयकांप जाणवलो.
भारत, ब्रिटन, अमेरिका मजत करतले
मोरोक्कोंतल्या भुंयकांपा विशीं भारताचे प्रधानमंत्री नरेंद्र मोदी हांणी दुख्ख उक्तायलें. तांणी म्हणलें – आमी ह्या दुख्खाच्या काळांत मोरोक्को वांगडा आसात. आमी खंयच्याय तरेन मजत करपाक तयार आसात. अमेरिकेचो अध्यक्ष जो बायडेन आनी ब्रिटीश प्रधानमंत्री ऋषी सुनक हांणीय मोरोक्कोक शक्य तितली मजत दिवपा विशीं चर्चा केली. सध्या ते सगले दिल्लींत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
