भांगरभूंय | प्रतिनिधी
पेडणें: दोन दिसां आदींच पर्यटन खात्यान मोरजी विठ्ठलदास वाड्या वयले दर्यादेगेर शेंकड्यांनी लांकडी खाटी बेकायदो तरेन घालून अतिक्रमण केल्लें. खात्या वतीन तांचेर कारवाय करून खाटी सयत कदेलां, मेजां जप्त केल्लीं. ही कारवाय ताजी आसतनाच सोमारा 26 सप्टेंबराक परतून दर्यादेगेर शेंकड्यांनी लांकडी खाटी बेकायदो तरेन घातल्यात.
दोन दिसां आदींच सात रिक्षा आनी तीन टेम्पो भरून शेकड्यांनी खाटी, मेजां आनी कदेलां जप्त केल्यात. त्यो आमचे कडेन आसात. दर्यादेगेर परतून अतिक्रमण जालें जाल्यार परतून कारवाय करतले, अशी शिटकावणी उपसंचालक गजानन महाले हांणी तांचे कडेन संपर्क केलो तेन्ना दिली. ज्या दिसा पर्यटन खात्यान कारवाय केल्ली तेच राती जप्त केल्ल्यो खाटी आनी मेजां तशेंच कदेलां वेवसायिकांक परतून दिल्लीं, अशें ह्या वाठारांतले लोक उलयतात. ते संबंदांत उपसंचालक महाले हांचे कडेन संपर्क केलो तेन्ना तांणी सांगलें, जप्त केल्लें सामान आमी कोणाकूच परतून दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
