भांगरभूंय | प्रतिनिधी
भांगरभूंय । प्रतिनिधी
मोरजीः मोरजी ग्रामसभेंत मोरजी पंचायत वाठारांतल्या तेंबवाडो दर्यादेग वाठारांत सरकारा वतीन वेगळे तरेचें गार्डन बांदपाची येवजण आसा. ते येवजणेक थलाव्या लोकांनी खर विरोध केला. तशेंच पार्कींग वेवस्था ही नवे पद्दतीन थंय करची न्हय, अशें मागलां. चेंजींग रूम आसात, थंय तशेच तरेचे चेंजींग रून तयार करचे, मात ते दुसरे कडेन व्हरून दर्यादेगेची वाट लावचे खातीर थंयच्यान दुसरे कडेन वचपाक रस्ते बांदपाक आमचो खर विरोध आसा. माळराना वयले सर्वे नं. 11 तले जमनीर जे मेरेन जमीन धनी आनी जमीन घेवप्यांचे वाद सोंपनात, ते मेरेन कसलेच तरेचे परवाने ते जमनीर दिवचे न्हय, अशी नेटाची मागणी करपी थाराव ग्रामसभेंत मंजूर केले.
मोरजीची ग्रामसभा सरपंच मुकेश गडेकार हांचे अध्यक्षते खाला आयोजीत केल्ली. ह्या वेळार पंच मंदार पोके, पंच फटू शेटगांवकार, पंच सुरेखा शेट गांवकार, पंच विलास मोर्जे, पंच रजनी शिरोडकार, पंच स्वप्नील शेटगांवकार, पंच सुप्रिया पोके हाजीर आशिल्ली.
सरपंच मुकेश गडेकार हांणी येवकार दिलो आनी प्रास्तावीक केलें. पंचायत सचीव सचीन हांणी फाटले ग्रामसभेचो इतिवृतांत वाचून कायम केलो.
मोरीज पंचायत वाठारांत मोरजी गांवाचें अस्तित्व तिगोवन दवरचे खातीर पंचायत मंडळान मुखार सरून, जे वेगवेगळे बेकायदो प्रकल्प येवन माळरानार पर्यावरणाचें लुकसाण करपाक सोदतात ताका हरकत घेवची, अशी नेटाची मागणी लोकांनी केली.
तेंबवाडो दर्यादेग वाठारांत पार्कींग येवजण आनी थंय नवे पद्दतीच्या गार्डनाच्या नांवा काला पर्यावरणाचें लुकसाण करपी प्रकल्पांक आमी थारो दिवचे नात, अशी शिटकावणी मयूर शेटगांवकार हांणी दिली. तांणी तसो थाराव लेगीत मांडलो. तशेंच मोरजी गांवा खातीर भौशीक बांदकाम खात्या वतीन उदक पुरवण विभागा वतीन कितलें उदक येता? आतां मेरेन कितलें उदक मेळ्ळें, हाचो हिशेब पंचायती कडेन आसा? आसा जाल्यार तो सादर करचो. जर उदक वेळार मेळना जाल्यार वेवसायीक प्रकल्पा खातीर नळाचीं कनेक्शनां कशीं दितात, अशे प्रस्न मयूर शेटगांवकार हांणी उपस्थीत केले.
भाटीवाडो मोरेजेच्या लोकांनी सांगलें, जे मेरेन माळराना वयल्या सर्वे नं. 11 तले जमनीचे वाद सोंपनात ते मेरेन थंय कसलेच तरेच्या मेगा प्रकल्पांक परवाने दिवचे न्हय. माळरानार वचपी वाटेर जी गेट घातल्या ती तत्काळ काडची. थंय 11 केव्ही भुंयगत वीज केबल घातला तोवूय काडचो. माळरानार नव्यो बोअरवॅल मारपाक परवाने दिवचे न्हय, अश्यो नेटाच्यो मागण्यो लोकांनी केल्यो.
मोरीज पंचायत वाठारांत जे थळावे भुंयपूत ल्हान- व्हड वेवसायीक आसात, त्या वेवसायिकां कडल्यान सरकारी नेमा प्रमाण जो कर घेतात, तातूंत सवलत दिवची. तसो अधिकार पंचायतीक आसता. ताचो वापर पंचायतीन करचो, अशी मागणी मयूर शेटगांवकार हांणी केली.
गार्बेज म्हयनाळी बसका कित्याक जायना? बसका जाल्यार कितले म्हयने जाले? अशे प्रस्न तुकाराम शेटगांवकार हांणी उपस्थीत केले.
एप्रीलांत दोन मिटर रूंद केल्ल्या रस्त्यार डांबरीकरण करून लेगीत रस्तो व्हांवून गेला. व्हड व्हड फोंडकुलां पडल्यांत. पावसाळ्यांत तीं फोंडकुलां फातर आनी माती घालून पुरयले खरे, पूण दुसऱ्या दिसा थंय चिखलाचें साम्राज्य जाल्लें, अशें तुकाराम हांणी नदरेक हाडून दिलें.
न्यू वाड्यार हॉटेलकार भौशीक बांदकाम खात्याचो रस्तो स्वताची मालमत्ता आशिल्ले वरी रस्त्याचेर गाडयो पार्क करतात. ग्रामसभेची जें चित्रिकरण करतात, ताका कितले पयशे दितात? ग्रामसभेंत दर खेपे थाराव घेतात, पूण फुडें कांयच हालचाल जायना. रस्त्या कुशीचे जायरातीचे बोर्ड आसा तशेंच आसात. ताची येणावळ कोणाक वता? भौशीक बांदकाम खात्याक काय पंचायतीक, अशेंय प्रस्न तुकाराम हांणी उपस्थीत केले. सरपंच मुकेश गडेकार हांणी प्रस्नांच्यो जापो दिवपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
