भांगरभूंय | प्रतिनिधी
ऑक्टोबरांत प्रधानमंत्र्यां हस्तुकीं जातलें उक्तावण
भांगरभूंय I प्रतिनिधी
पणजी : मोपा विमानतळा वयल्यान विमानाच्या लँडिंगाची चांचणी येसस्वी जाल्ल्यान आतां विमानतळाच्या उक्तावणाचो मार्ग मेकळो जाला. प्रधानमंत्री नरेंद्र मोदी हांच्या सवडीचे तारखेक आतां विमानतळाचें उक्तावण जातलें. ऑक्टोबरांत म्हयन्याभरांत उक्तावण जावये, अशी म्हायती गोपांनी दिली.
लँडींग चांचणी येसस्वी जावप हो मोपा विमानतळा खातीर मैलाचो फातर थारला. मुंबय सावन आयिल्लें इंडिगो एरलायन्स कंपनीचे ए 320 विमान मोपा विमानतळाचेर येसस्वी पणान देंवलें. हे वेळार नागरी उड्डाण म्हासंचालक, विमानतळ प्राधिकरण तशेंच जीएमआर कंपनीचे अधिकारी हाजीर आशिल्ले. चांचणी येसस्वी जाल्ल्यान रिक्वायर्ड नेव्हिगेशन पर्फोमन्स (आरएनपी) प्रक्रिया पुराय जाल्या, अशें जीएमआर कंपनीन पत्रकांत म्हणलां.
मोपा विमानतळा वयल्यान पयलें उड्डाण 15 ऑगस्टाक जातले अशें मुख्यमंत्री डॉ. प्रमोद सावंत हांणी सांगिल्लें. पूण विमानतळाच्या उड्डाण म्हामार्गाचें (रनवे) काम अर्दवट उरिल्ल्यान उक्तावण सुवाळो लांबणेर पडला. पूण जे मेरेन दिल्ली विमानतळ प्राधिकरणा कडल्यान ‘रन वे टेस्टींग’ वा सुरक्षेचे नदरेन परवानो मेळना, ते मेरेन विमानतळा वयल्यान कसल्याच प्रकाराची विमान उड्डाणां जावची नात. ते प्रमाण सुरवातीक विमानांत प्रवासी नासतना ‘इंडिगो’ हे कंपनीचे कांय अधिकारी, तशेंच विमानतळ प्राधिकरण अधिकाऱ्यांक घेवन विमान उड्डाणाची टेस्ट घेतली.
मोपा विमानतळा खातीर सरकारान सुमार एक कोटी परस चड चौखण मिटर जमीन संपादन करून पेडणें म्हालाच्या उदरगतीच्या नदरेंतल्यान हो प्रकल्प उबारला.
हो राष्ट्रीय प्रकल्प आशिल्ल्यान प्रकल्पा खातीर ज्या शेतकारांनी आपल्यो जमनी दिल्यात, तांकां त्या जमनीचो योग्य मोबदलो मेळप गरजेचें. पूण अजून मेरेन सरकारान हे विशीं पावलां उबारूंक ना.
सुरवातीक मुख्यमंत्री डॉ. प्रमोद सावंत हांणी 15 ऑगस्टाक पयलें उड्डाण मोपा आंतरराष्ट्रीय विमानतळा वयल्यान जातले, अशें जाहीर केल्ले. पूण रन वेचें काम अर्दवट स्थितींत आशिल्ल्यान हे उड्डाण लांबणेर पडिल्लें. ते उपरांत मुख्यमंत्र्यान सप्टेंबर म्हयन्यांत उड्डाण जातलें वा उक्तावणाचो सुवाळो जातलो, अशें जाहीर केल्ले.
विमानतळाक लागून पर्यटन आनी रोजगाराच्यो सुविधा
मोपा विमानतळाक लागून गोंयांत पर्यटन तशेंच रोजगार निर्मणीच्यो सुविधा तयार जातल्यो, अशें जीएमआर विमानतळाचें मुखेल कार्यकारी अधिकारी आर. व्ही. शेषन हांणी सांगलें. ते भायर राज्याच्या समाजीक आनी अर्थीक उदरगतीक लेगीत उर्बा मेळटली. रिक्वायर्ड नेव्हिगेशन पर्फोमन्स (आरएनपी) चांचणी पुराय जावप गरजेचें आसता. धांवपट्टी तशेंच विमान लँडिंगाचे सुरक्षे खातीर ‘आरएनपी’ चांचणी प्रक्रियाय गरजेचीं थारता. ही चांचणी करपा खातीर बरेच नियोजन आनी जतनाय घेवची पडटा. विमानतळ सुरू जावपाचे नदरेंतल्यान हे एक म्हत्वाचें पावल थारता, अशें सीईओ आर. व्ही. शेषन हांणी म्हणलें.
मोपा विमानतळाच्या प्रस्तावाक 22 वर्सां पयली मान्यताय मेळिल्ली. ह्या प्रकल्पाक बरोच विरोध जाल्लो. मोपा जालो जाल्यार दाबोळी विमानतळ बंद जातलो ह्या मुद्याचेर विरोध जाला. विमानतळाच्या समर्थना खातीर आनी विरोधा खातीर आंदोलनां जालीं. काम सुरू जाले उपरांत जमीन संपादनाची समस्या निर्माण जाली. जायत्या शेतकारांनी न्यायालयांत धांव घेतली. राष्ट्रीय हरीत लवादान लेगीत प्रकल्पाक कांय काळ स्थगिती दिल्ली. मदल्या काळांत कोरोना म्हामारीक लागून कामाची गती उणी जाल्ली. आतां मात विमानतळाचें काम पुराय जालां.
मुळाव्याे सुविधा उबारणीचें एक सपन पुराय : मुख्यमंत्री
विमान लँडिंगाची चांचणी करपाची प्रक्रिया पुराय जाल्यान विमानतळाचें चडशें काम पुराय जालां. मुळाव्यो सुविधा उबारपाचें एक सपन विमानतळाच्या रुपान पुराय जातलें, अशें मुख्यमंत्री डॉ. प्रमोद सावंत हांणी म्हणलें. विमानतळाचें ऑक्टोबरांत उक्तावण जातलें, अशें मुख्यमंत्र्यान हाचे पयलीच जाहीर केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
