भांगरभूंय | प्रतिनिधी
पणजी : मोपा विमानतळाचेर आयज विमान देंवोवपाची (लँडींग) चांचणी जातली. विमानतळाचेर चांचणे खातीर आयज इंडिगो विमान लँड जातलें. नागरी उड्डाण खात्याचे संचालक सुरेश शनबोगे हांणी ही म्हायती दिली.
विमान लँडिंगाचे चांचणे खातीर विमानतळ प्राधिकरण तशेंच जीएमआर कंपनीचे तज्ञ आयल्यात. खर सुरक्षा वेवस्थेंत विमानाची चांचणी जातली. सिग्नल, धांवपट्टी तशेंच हेर गजालींची तांत्रीक चांचणी जातली. जीएमआर कंपनीन खूबशा विमानतळांचें बांदकाम केलां. तांचे कडेन तज्ञ आसात. हाका लागून चांचणी येसस्वी जावपाक आडखळ येवची ना अशी म्हायती सुरेश शनबोगे हांणी दिली. विमानतळाचें काम पुराय जालां. चांचणी जावप बाकी आशिल्लें. विमान लँडिंगाची चांचणी जाले उपरांत हेर सोपस्कार पुराय जातले. कामाची गती पळयत जाल्यार विमानतळाचें उक्तावण ऑक्टोबरांत शक्य आसा अशें तांणी सांगलें. प्रधानमंत्री नरेंद्र मोदी हांचे हस्तुकीं विमानतळाचें उक्तावण जातलें. प्रधानमंत्र्यांचे सवडी प्रमाण उक्तावणाची कार्यावळ जातली अशें तांणी सांगलें.
मोपा विमानतळाचें उक्तावण 15 ऑगस्ट ते 30 ऑगस्ट मेरेन जावपाचें आशिल्लें. तें जालें ना. चांचणीच्या कामाक कळाव जाल्ल्यान ऑगस्टांत उक्तावण जालें ना. विमानतळाचें उक्तावण ऑक्टोबरांत जातलें अशें मुख्यमंत्री डॉ. प्रमोद सावंत हांणी स्वातंत्र्य दिसा वेळार जाहीर केलां.
मोपा विमानतळाचें उक्तावण जाले उपरांत दिसाक 150 विमानां येवप शक्य आसा. संवसारीक पांवड्या वेल्यान एअरलायन्स कंपनीं कबलात करपाक इत्सूक आसात.
मोपा विमानतळाचो लाव गोंयाकूच न्हय तर लागसारच्या सिंधुदुर्ग जिल्ह्याक लेगीत मेळटलो. येरादारी सयत पर्यटनाक उबारी मेळटली. मोपा सयत पेडणें म्हालांत जमनीचे दर वाडपाक लागल्यात. जमीन विक्रीचें प्रमाण लेगीत वाडपाक लागलां.
मोपा विमानतळाच्या प्रस्तावाक बावीस वर्सां पयली मान्यताय मेळिल्ली. ह्या प्रकल्पाक बरोच विरोध जाल्लो. मोपा जालो जाल्यार दाबोळी विमानतळ बंद जातलो ह्या मुद्याचेर विरोध जाला. विमानतळाच्या समर्थना खातीर आनी विरोधा खातीर आंदोलनां जालीं. काम सुरू जातकीर जमीन संपादनाचो गुंतो तयार जालो. शेतकार न्यायालयांत गेले. राष्ट्रीय हरीत लवादान लेगीत प्रकल्पाक काय काळ स्थगिती दिल्ली. कोरोनाक लागून कामाची गती उणी जाली. आतां मात विमानतळाचें काम पुराय जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
