भांगरभूंय | प्रतिनिधी
भांगरभूंय I प्रतिनिधी
पणजी : मोपा आंतरराष्ट्रीय विमानतळाक नांव दिवपाचो विशय केंद्रीय विमान उड्डाण मंत्रालयाचे अखत्यारीत येता. ताका लागून केंद्र सरकार योग्य विचार करून नांवा विशीं निर्णय घेतलें, अशें मंत्री तशेंच मगोचे फुडारी सुदिन ढवळीकार हांणी मंगळारा पत्रकारां कडेन उलयतना स्पश्ट केले.
गोंयचे पयले मुख्यमंत्री स. भाऊसायब बांदोडकार हांचेंच नांव मोपा विमानतळाक दिवचें असाे थाराव कांय दिसां पयलीं मगो पक्षान घेतिल्लो. ते उपरांत मंत्री सुदिन ढवळीकार हांणीय विमानतळाक भाऊसायबांचेंच नांव दिवचें हे खातीर यत्न सुरू केल्ले. तातूंतच राज्य सरकारान आदले मुख्यमंत्री मनोहर पर्रीकार हांच्या नांवाचो प्रस्ताव सादर केल्ल्याचे मुखार आयिल्ले. ताचेर सोमारा पत्रकारां कडेन उलयतना मोपा विमानतळाक नांव दिवपाचो अधिकार केंद्रीय विमान उड्डाण मंत्रालयाक आसा. ताका लागून राज्य सरकार फक्त केंद्रा कडेन चर्चा करपाक शकता, ते प्रमाण चर्चा सुरू आसा, अशें म्हणून मुख्यमंत्री डॉ. प्रमोद सावंत हांणी हो विशय टाळपाचो यत्न केल्लो. ते उपरांत पत्रकारांनी मंगळारा ह्याच विशया वयल्यान सुदिन हांकां विचारल्यात, मोपा विमानतळाक भाऊसायबांचें नांव दिल्यान निश्चीत सगल्यांकूच खोस जातली. पूण हो विशय केंद्र सरकाराचे अखत्यारीत आशिल्ल्यान राज्य सरकार कितेंच करपाक शकना. ताका लागून केंद्रान जे नांव निश्चीत करतले तेच विमानतळाक दितले, अशें म्हणून तांणीय हो विशय टाळपाचो यत्न केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
