भांगरभूंय | प्रतिनिधी
मोप आंतरराष्ट्रीय विमानतळाक कोणाचें नाव दिवप, ह्या प्रस्ना वयल्यान नवो वाद सुरू जाला. खरें म्हळ्यार मुख्यमंत्री दो.
प्रमोदबाब सावंत सरकारान हे वाद सुरू करपाची संदूच दिवक जायनाशिल्ली. अजूनय वेळ वचूंक ना. हांव कोंकणी साहित्यीक आनी गोंयचे अस्मितायेचेर प्रेम करपी. ती राखपा खातीर जाल्ले चळवळींतलो चानयेचो वांटो उखलपी एक वावुरपी. महाराष्ट्रांतल्या कांय वसाहतवादी फुडाऱ्यांच्या भुल्लूसावन उडोवपी विचाराक बळी पडून पयले मुख्यमंत्री दयानंद बांदोडकार हांणी गोंयचें महाराष्ट्रांत विलिनीकरण करपाचो जो विशय फुडें हाडलो ताच्या हांव विरोधांतलोच. ते भुमिकेचें आयज कोणूच समर्थन करूंक शकना. पूण, गोंयचे सामान्य जनतेक स्वाभिमानान उबे करपाक भाऊन दुरद्रुश्टीतल्यान शिक्षणाची न्हंय दारादारांत पावयली, गोंयची बुन्याद भक्कम करपाचें, मनशाच्या मनाचो विकास करून समाजाक न्यूनगंडातल्यान भायर काडपाक जें योगदान दिलें तें कोणे विसरचें न्हय.
गोंय मुक्त जाले उपरांत थारावीक वर्गाक सत्ते भायर दवरपाचो कांय सामान्य वर्गांतल्या लोकां कडल्यान विचार आयलो, तो भायरावन सगल्या घटकांक घेवनच गोंयाक आकार दिवंक जाय हे विचार लोकांक पटोवपाचे बाबतीत भाऊन जें योगदान दिलें, तें मोप विमानतळाक भाऊचें नांव दिवपाक जे विरोध करतात तांणी विसरचें न्हय. गोंयच्या राजकारणाचो अभ्यास करीत जाल्यार गोंयचें विधीलिखीत बरें आशिल्लें म्हणून मुक्ती उपरांत गोंयांक भाऊच्या रुपान व्हडल्या काळजाचें फुडारपण लाबलें, अशें हांव म्हणन.
मोप विमानतळ जावप म्हळ्यार विदेशी पर्यटनाक वाव मेळप. आयज पर्यटन राज्याक येणावळ मेळोवन दिवपी म्हत्वाचो वेवसाय जाला. पर्यटन वेवसायाचो दर्जो वाडलो जाल्यार तोच आमकां तारतलो. पूण, गोंय मुक्त जाले उपरांत देशी- विदेशी पर्यटनाची बुन्याद भाऊन कशी घाली, हें इतिहास चाळीत जाल्यार कळटलें. म्हज्या ‘प्रेरणा रूख’ ह्या पुस्तकात तें हांवें बरयलांय. त्या काळांत गोंयांत पर्यटन वेवसायाची संकल्पनाय नाशिल्ली. आंतरराष्ट्रीय किर्तीचे हाॅटेलियर अजीत केरकार टाटा कंपनीच्या माध्यमांतल्यान भारतांत देशी- विदेशी पर्यटनाच्या मळार व्हडलें काम करताले. भारतांत पॅलेस टुरिजमाची संकल्पनाय तांणी रूजयल्ली. मुख्यमंत्री भाऊसायबांक ते विमान प्रवासांत मेळ्ळे. केरकार मूळ गोंयचे. अंत्रुजेंतल्या केरी गांवचे. सुरश्री केसरबाय केरकार हांच्या भावाचे ते पूत. गोंयकार म्हणून पर्यटनाच्या मळार गोंयां खातीर तूं कांयच करूक सोदीना, असो प्रस्न भाऊन तांकां केलो. तोच आदेश अशें मानून तांणी आपले जबाबदारेचेर सिकेरी ताज हाॅटेल उबारलें. गोंयांत विदेशी पर्यटनाक वाव मेळतसो दिसना, अशें दिशिल्ल्यान उद्येगपती टाटाय तयारी दाखय नाशिल्ले, पूण भाऊचें उतर भायर उडोवंक जायना हे भावनेंतल्यान आनीक कांय गुंतवणूकदारांक घेवन केरकार हांणी हो हाॅटेल प्रकल्प उबारलो. ताज हाॅटेल हें गोयांतलें पयलें तारांकीत हाॅटेल. ताच्या रूपांत विदेशी पर्यटकांक पायाभूत सुविधा तयार जाली. उपरांत तारांकीत हाॅटेलांची माळूच आयली.
आयज गोंय हें संवसारांतल्या म्हत्वाच्या पर्यटन थळां मदलें एक जालां. तांतल्यान हजारांनी लोकांक प्रत्यक्ष, अप्रत्यक्ष रोजगाराच्यो संदी मेळूंक पावल्यो. आतां मोप विमानतळ सुरू जातकच वेवसायाची सयाच बदलतली. म्हत्वाची गजाल म्हळ्यार भाऊनूच पर्यटनाची बुन्याद घाली, हाचो विचार आमी करूंकच जाय. तांचे दुरद्रुश्टीक नमन करपाक विमानतळाक भाऊंचें नाव दिवप औचित्यपूर्ण थारतलें. हाचेर वाद आसू नजो. कांय घटक सोडले जाल्यार गोंयचे तमाम जनतेची तीच भावना आसा. तिचो आदर जावचो.
आनीक एक म्हत्वाची गजाल म्हळ्यार सरकारान भाऊच्या नावांचो विचार केलोना जाल्यार, ह्या प्रस्नाचेर बोवाळ करून राजकारणातल्यान कुपां आड जाल्ले चंद्र भायर सरपाचो यत्न करतले. आपले राजकी पोळे भाजून घेतले. गरज नासतना सरकारच्या विरोधान राजकारण करून वातावरण इबडावन उडयतले. सरकारान विमानतळाक बांदोडकारांचें नाव दिवपाचो निर्णय घेवन तो आतांच जाहीर केलो जाल्यार, ह्या पोळी भाजून खावप्यांचें वारेंच वतलें. थारावीक लोक भाऊंचें नाव दिवपाची मागणी करता म्हणून ती मान्य बी करप ना, असो विचार करप समा न्हय. तांची ही मागणी रास्त आसा. तांचे तिडक उक्तावपाचे पद्धतीक कोणूय आक्षेप घेवंक शकता. सुभाषबाब वेलिंगकार मुळांत राजकारणी न्हयच. तो तत्वनिश्ठ. ताचीच न्हय आमचे सारक्यांचीय तीच भावना आसा. सगळ्याच फुडाऱ्यांचें गोंयचे बांदावळीत योगदान आसाच. पूण भाऊक पर्याय ना, हें मानून घेवपाकूच जाय. भाऊच्या नांवांक विरोध बी करप म्हळ्यार तीं आमचीं एकतर पडमूरपणां थारतली ना जाल्यार तांकां भाऊंच्या योगदानाची कल्पनाच ना म्हणची पडटली.
दर विशय राजकी करपाचें हालींसराक कांय लोकांक वेसनूच लागलां. तें बऱ्याचें न्हय. लोकभावनेचो आदर आनी वस्तुस्थितीचो विचार करून विमानतळाक बांदोडकाराचें नांव दिल्यार भाजप सरकाराची प्रतिश्ठा वाडटली, हातूंत दुबावूच ना. सरकारान ह्या प्रस्नाचेर चड दीस राजकारण करपाची संद कोणाकूच दिवची न्हय. नांव दिवपाच्या प्रश्नाचेर भाजप सरकार पिशेंपणा करचोना, अशें म्हाका दिसता. आनी करूकय जायना. आमी सगळे म्हळ्यार चाळीसय आमदार भाऊन घाल्ले शिक्षणाचे बुन्यादीचेरच उबे आसात, हाचो विसर पडचो न्हय. विमानतळाक नांव दिवपाचो अधिकार केंद्रीय हवाई उड्डाण मंत्रालयाचो अशें सांगून आमकां खाकें वयर काडूंक मेळना. तो विमानतळ आमचे भूंयेर जाला. म्हणटकच आमच्या लोकांचे भावनेचो विचार करूनच नांव दिवंक जाय. गोंय सरकारान केंद्राक तशी सुचोवणी करूंक जाय. थळाव्या सरकारची शिफारस मोदी सरकार केन्नाच भायर उडोवचोना.
मोपाक गोंयकाराचेंच नाव जाय, ही म्हजी भावना. निमणो निर्णय सरकाराचो. गोंयचें व्हडपण मिरोवक मेळटलें तसोच निर्णय घेवचो. गोंयांत जे नवे पूल तयार जाले ताचें सगळें श्रेय मनोहरबाबाकूच वता. तें कोणूच न्हयकारूंक शकना. ताचो विचार करून जुवारी पुलाक मात मनोहरबाबांचेंच नांव फावता. हांगां तांच्या नांवाचो विचार जालोना जाल्यारय आमी पडमूर थारतले.
इतलेंय करून सरकाराक भाऊचें नांव दिवपाक सामकेंच अडचणीचेंच जाता आनी तडजोड करूंक जाय जाल्यार णववे एॅर चिफ मार्शल हृषिकेश मुळगांवकार हांचें नांव दिवचें. ते मूळ गोंयकार. तांचें हवाई दळाक खूब व्हडलें योगदान आसा. हो विमानतळ नागरी आसलो तरीय एका वीर गोंयकाराचें नांव दिवपाची संद घेवं येता.
संजीव वेरेंकार
9422643629
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
