भांगरभूंय | प्रतिनिधी
विवीध शुल्कांचें तुळेंत दाबोळी विमानतळाक अॅर कंपनींची पसंती
पणजी : अॅरलायन कंपनीं खातीर मोपाच्या विवीध शुल्कांचें तुळेंत दाबोळी विमानतळाचें शुल्क उणें आसतलें. हाका लागून बऱ्याच अॅरलायन कंपनींची दाबोळी विमानतळाक पसंती आसतली. दाबोळी सावन पांच नकेत्री हॉटेलांय लागी आसात. पर्यटकांची लेगीत दाबोळीक पसंती आसतली. हाका लागून मोपा आनी दाबोळी मदीं आपशींच समतोल तयार जातलो, अशें येरादारी मंत्री मॉवीन गुदिन्हो हांणी सांगलें.
मोपा विमानतळाचें काम पुराय जालां. विमान उड्डाणाची चांचणी तशेंच हेर सोपस्कार येसस्वीरितीन पुराय जाल्ल्यान डिसेंबरांत विमानतळाचें उक्तावण निश्चीत आसा. उक्तावण जावचे पयलीच कांय एरलायन कंपनींनी मोपा विमानतळाचेर लँडिंगा खातीर नोंदणी सुरू केल्या. मोपा विमानतळ जाले उपरांत दाबोळी विमानतळ बंद जातलो, असो प्रचार पयलीं सावन सुरू आसा. ह्याच मुद्याचेर मोपा विमानतळाक दक्षीण गोंय सावन विरोध जातालो. मोपा विमानतळा उपरांत दाबोळी विमानतळ हो ‘घोस्ट’ (वापराविणें) विमानतळ जावपाची भिरांत विरोधी पक्ष फुडारी युरी आलेमांव हांणी उक्तायल्या. कतार अॅरलायन्सान दाबोळीचें बुकींग रद्द करून मोपा विमानतळाचेर बुकींग सुरू केल्ल्यान दुबावांत भर पडल्या. दाबोळी विमानतळ कार्यान्वीत उरपा खातीर खासा उपाय येवजण जातली तशेंच हे विशीं विमानतळ प्राधिकरणा सयत बसका जातली, अशें मुख्यमंत्री डॉ. प्रमोद सावंत हांणी सांगिल्लें. पूण अजून मेरेन बसका जावंक ना. विदेशी विमानां मोपाचेर जाल्यार देशी विमानां दाबोळी विमानतळाचेर लँडींग करपाचो प्रस्ताव आसा.
मोपा विमानतळ हो खाजगी विमानतळ आसा. साडे तीन हजार कोटींची गुंंतवणूक मोपा विमानतळाचेर जाल्या. दाबोळी विमानतळ प्राधिकरणाच्या अखत्यारीत येता. अॅरलायन कंपनींक तरेकवार शुल्कां भरचीं पडटात. मोपाचे तुळेंत दाबोळीचें शुल्क उणें आसतले. हाका लागून एरलायन कंपनींक मोपा परस दाबोळी सवाय थारतलो. तशेंच दाबोळी सावन दक्षीण गोंयची पांच नकेत्री हॉटेलांं लागी आसात. पर्यटकांंची लेगीत दाबोळीक पसंंती आसतली. हाका लागून आपशी दाबोळी विमानतळाक कांय अॅरलायन कंंपनींची पसंंती आसतली. विदेशी विमानांं मोपा विमानतळाचेर देंवली जाल्यार कांय देशी विमानां दाबोळी विमानतळाचेर देंवतली.
दाबोळीचेर साधन सुविधां खातीर 1,200 कोटी परस चड खर्च
दाबोळी विमानतळाचो देशांत तिसरो नंंबर लागता. विमानतळ प्राधिकरणाच्या हेर विमानतळांं परस हाचे पयलीं दाबोळीचेर चड विमानांं देंवल्यात. हाका लागून एरलायन कंंपनींची दाबोळीक पसंंती आसतली. दाबोळी विमानतळाचो दर्जो वाडोवपा खातीर 800 कोटी खर्च जाल्यात. आनीक 450 कोटींचीं कामां सुरू आसात. सोबितीकरण, पार्कींग तशेंच आनीक एक रन वे उबारपाचो वावर सुरू आसा. इतलो जो खर्च केला, तो दाबोळी विमानतळ बंंद करपाक न्हय, अशें येरादारी मंंत्री मॉवीन गुदिन्हो हांंणी सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
