भांगरभूंय | प्रतिनिधी
फाटलीं आठ वर्सां नरेंद्र मोदी सरकारान उत्तम प्रशासन, नेटाचो विकास जनतेक दिला. विकासाचीं कामां करतना दुडवांचो उणाव निर्माण जावचो ना, हाचीय जतनाय घेतल्या. शेतकार, महिला आनी तरणाट्यांच्या हिता खातीर, आपरोजगार करप्यां खातीर नव्यो नव्यो येवजण्यो चालीक लायल्यात. दरेका राज्याचो सर्वांगी विकास जावचो हे खातीर यत्न चलयल्यात. तीच मोदी सरकाराची मोख आसा आनी ती पूर्ण करपा खातीर राज्यांतलीं भाजपा सरकारां आपापले परीन यत्न करतात.
पूण प्रस्न आसा तो असो- लोकहिताच्यो येवजण्यो खऱ्यांनीच गरजवंतां मेरेन पावतात? राज्यांचो सर्वांगी विकास करप सुरू केला ताचेर सामान्य मनीस खूश आसा? विचार करपा सारको प्रस्न. मोदी सरकारान शेतकारां खातीर कितल्योय येवजण्यो केल्यो तरी ताचो फावो तसो परिणाम जायना. कारण आयची तरणी पिळगी शेतांत देंवूक तयार ना. खूब फावटीं शेतांत कामां करपाक मनशां मेळनात. अनुदान, रिणां दिवन सरकारान आपले परीन शेतकारांक थाकाय दिल्या खरी, पूण शेता खातीर लागपी सारें, कीडनाशकां, बियाणीं हांच्या दरांत सुमारा भायर वाड जाल्या. ताका लागून खर्चाचो ताळमेळ बसयतना शेतकारांक नाकापुरो जाता. हाचेर उपाय काडपाची गरज आसा.
आज घरगुती गॅस, पॅत्राॅल, खावपाचें तेल, सीएनजी तशेंच भाजयांचे दर वाडत आसात. आयजवेर अनेक पक्षांचीं कितलींशींच सरकारां आयलीं, पूण वाडटे म्हारगायेंतल्यान सामान्य मनशाक थाकाय दिवप कोणाकूच जमलें ना. कांय राज्यांनी इंधना वयलें व्हॅट उणे करपाचे संकेत दिल्यात. व्हॅट उणो केल्ल्यान पॅत्राॅल मातशें देंवतलें आनी थोडी भोव थाकाय मेळटली अशें म्हारगायेंत हुलपल्ल्या सामान्य लोकांक दिशिल्लें, पूण केंद्र सरकारान घरगुती गॅसाचें मोल लागीं लागीं 50 रुपयांनी वाडयलां. म्हणटकूच सरकार एका हातान दिता आनी दुसऱ्या हातान घेता असोच ताचो अर्थ जालो ना? सध्या बेरोजगारी, म्हारगाय, भ्रश्टाचार ह्या गंभीर प्रस्नां कडेन पळोवपाक कोणाकूच उसरपत ना. मदीं मदीं थोडी भोव थाकाय दिवपाची जायरातबाजी जाता. पूण 100-200 रुपया वाडोवप आनी 5-10 रुपयांची थाकाय कित्याक पावता? पॅत्राॅलाचे दर वाडत आसात, गॅसान हजारी हुपल्या, शिक्षणाचो खर्च वाडटा, वखदां-पाणयांक लेगीत लोकांचो पयसो उदका भशेन व्हांवता, सरकारी हाॅस्पिटलांनी सारके उपचार जायनात म्हणून सामान्य मनीस मनांत नासुनूय खाजगी हाॅस्पिटलांनी उपचार घेता आनी जीणभर जोडिल्ली जोड खाजगी हाॅस्पिटलांतल्या दोतोरांक दिवन येता. हें अशें कित्याक घडटा? सरकारी हाॅस्पिटलांनी दुयेंतींक बऱ्यांतल्यो बऱ्यो सुविधा दिवपाक आमी कित्याक उणे पडटात?
जीएसटी अंतर्गत नव्या वस्तूंचो, सेवांचो आसपाव करून लागींलागीं दरेक गजालीचेर कर लावप सुरू आसा. हें सगलें वाडटना आवक मात वाडना. ताका लागून कितल्याश्याच कुटुंबांचें अर्थीक गणितूच इबाडलां आनी देखुनूच चडश्या घरांनी ताणतणाव, पिरंगणी वाडूंक लागल्यात. सत्तेर कोणूय येवूं लोकांच्यो विवंचना सोंपनात अशी परिस्थिती आसा. हाचेर सरकारा कडेन उपाय ना? गॅस, पॅत्राॅल, तेल हांचे दर उणे करपा खातीर सरकार कांयच करूंक शकना? हालींच घरांत वापरतात त्या जिणे गरजेच्या वस्तूंचेर जीएसटी लागू केल्या. ताका लागून कांय पॅकबंद अन्नधान्य आनी खावपाच्या जिनसांचे दर वाडटले. दीसपट्ट्या वापरांतल्यो ह्यो वस्तू म्हारग जाल्ल्यान ताचो अर्थीक फटको गिरायकांक बसतलो. गिरायकांक पॅक्ड, सीलबंद, लेबल लायिल्ल्या वस्तूं खातीर चड पयशे मेजचे पडटात. धंय, ताक, पनीर, पीठ, सोयाबीन, मटार, गंव आनी हेर धान्यां म्हारग जाल्यांत. कारण ह्या सगल्यांचेर आतां 5 टक्के जीएसटी लागू जाल्या.
सध्या 11.3 लाख भारतीय विद्यार्थी विदेशांत शिक्षण घेतात आनी 2022 वर्सा हो आंकडो वाडटलो अशें हालींच राज्यसभेंत सांगलां. 2018 वर्सा सरकारान आठ नव्या आयआयटींक अर्थीक पुरवण करपा खातीर बजेट वाडयलां तरी आसतना विदेशी अभ्यासाक इतली मागणी कित्याक? भुरग्यांक विदेशांत धाडपा खातीर पालकांनी जमनी आनी इस्टेटी विकल्यांत वा व्हड रिणां घेतल्यांत अश्यो खबरो कानार पडटात. फाटल्या दोन दशकांत भारतांत नवीं खाजगी विद्यालयां वाडिल्लीं आसतना विदेशांत शिक्षण घेवपाचो मोह अजुनूय विद्यार्थ्यांक कित्याक जाता? भारतांत दर वर्सा कोट्यांनी विद्यार्थी पदवीचें शिक्षण घेतात. विदेशांतल्या शिक्षणीक संस्थां कडेन आमच्यो संस्था दर्जा बाबतींत सर्त कित्याक करूंक शकनात? आयजूय आमच्या देशांत विदेशी विद्यापिठांचे कॅम्पस नात. ते जाले जाल्यार विद्यार्थ्यांक विदेशांत वचपा पासून आमी आडावंक शकतले. आमी आमचीं महाविद्यालयां थोडीं अदीक आकर्शक केलीं जाल्यार आमी आमचे प्रतिभावंत भायर वचपा पासून आडावंक शकतले. खंयच्याय तरणाट्याक शिक्षणा खातीर वा नोकरे खातीर विदेशांत वचपाची गरज पडची ना असो देश आमी कित्याक निर्माण करूंक शकनात? तशें जालें जाल्यार दरेका राज्याचो सर्वांगी विकास जालो अशें आमी म्हणूंक शकतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.