भांगरभूंय | प्रतिनिधी
पणजीः प्रधानमंत्री नरेंद्र मोदी हांच्या फुडारपणा खाला केंद्र सरकारान फाटल्या इकरा वर्सांत गोंया सयत देशाक अमरत्वांत व्हेला. केंद्र सरकारान 2047 मेरेन देशाची उदरगत करपाचें ध्येय दवरलां. पूण आमच्या सरकारान 2037 मेरेन गोंयची उदरगत करपाचो निर्णय घेतला, आनी हे संबंदी 19 डिसेंबर मेरेन व्हिजन डॉक्युमेंट तयार करतले अशें मुख्यमंत्री डॉ. प्रमोद सावंत हांणी स्पश्ट केलें.
‘संकल्प से सिध्दी’ कार्यावळी विशीं म्हायती दिवपा खातीर मंगळारा पणजेच्या भाजप कार्यालयांत जाल्ले पत्रकार परिशदेंत ते उलयताले. ह्या वेळार भाजपाचे प्रदेशाध्यक्ष दामू नायक ताचे वांगडा हाजीर आशिल्ले.
केंद्रांतल्या मोदी सरकारान 2014 वर्सा गोंया सयत पुराय देशाची सर्वांगी उदरगत करपाचो संकल्प केल्लो. तो संकल्प मोदी हांणी सिध्द केला. देशांतल्या दरेका क्षेत्रांत उदरगत साध्य करून मोदी हांणी देशाक अमरत्वांत हाडला. देखून 2047 वर्साचो विकसीत भारत पयस ना अशें मुख्यमंत्री डॉ. प्रमोद सावंत हांणी म्हणलें.
फाटल्या इकरा वर्सांत देशांतल्या विमानतळांचो आंकडो दुपेटीन वाडला. गांवगिऱ्या वाठारांतल्या लोकांची समाजीक आनी अर्थीक उदरगत घडोवन हाडपाक केंद्र सरकार येसस्वी जालां, कारण वेगवेगळ्यो समाजीक येवजण्यो दरेका घरांत पावल्यात. मुळावी बांदावळ नेटान वाडत आसा. शेतकी, भलायकी, रोजगार आदी मळार केंद्र सरकारान व्हड उदरगत केल्या, हाका लागून देशांतली गरिबी ना जाल्या आनी दर मनशाक मेळपी येणावळ वाडल्या अशें तांणी सांगलें.
वनमारे समाजाक मुखेल प्रवाहांत हाडले
केंद्र सरकाराच्या आदारान गोंय सरकारानय फाटल्या इकरा वर्सांत राज्यांतल्या सगळ्या क्षेत्रांत उदरगत केल्या. राज्यांतलें भाजपा सरकार जात आनी धर्माच्या आदाराचेर चलना जाल्यार ती युवा शक्ती, बायलां शक्ती, शेतकार शक्ती आनी गरीबांचें कल्याण ह्या चार तत्वांचेर चलता. देखून पयलेच खेपे आमच्या सरकारान वानरमारे समाजाक समाजीक येवजण्यो हाडून ह्या समाजाक मुखेल प्रवाहांत हाडल्यात असो उल्लेख मुख्यमंत्री डॉ. प्रमोद सावंत हांणी केला.
उदरगतीची म्हायती दरेका घरांत पावयतले
फाटल्या इकरा वर्सांत गोंयांत केंद्र आनी राज्य सरकारांनी जी प्रगती संकल्प से सिध्दी कार्यावळी खाला केल्या, ती राज्यांतल्या दरेका घरांत पावयतले. हे खातीर वेगवेगळे सुवातेर शिबिरां आनी मेळावो घडोवन हाडटले, अशेंय मुख्यमंत्र्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
