भांगरभूंय | प्रतिनिधी
छाननी सयत पुराव्यांची सत्यताय पडटाळणीचें काम सुरू
पणजी: पुर्तुगेजांनी मोडून उडयिल्ल्या देवळांचे पुनर्बांधणे खातीर पुरातत्व आनी पुराभिलेख खात्या कडेन आतां मेरेन वट्ट 16 अर्ज आयल्यात. खात्या कडल्यान तांची छाननी लेगीत सुरू आसा. हातूंतल्या ज्या देवळांचे पुर्तुगेजांनी मोडून उडयिल्ल्याचे पुरावे मेळटले तांचे पुनर्बांधणेची प्रक्रिया सुरू करतले अशें पुरातत्व आनी पुराभिलेख खात्याचे मंत्री सुभाष फळदेसाय हांणी सांगलें.
पुर्तुगेजांनी मोडून उडयिल्ल्या देवळांच्या पुनर्बांधणे विशीं खात्यान अर्ज तशेंच देवळांच्या इतिहासीक पुराव्यांची उपलब्ध म्हायती लेगीत मागयिल्ली. ते प्रमाण आतां मेरेन गोंयांतल्यान 16 अर्ज खात्या कडेन आयल्यात. खात्याच्या अधिकाऱ्या कडल्यान आयिल्ल्या अर्जांची छाननी तशेंच देवळांच्या पुराव्यांची सत्यताय पडटाळटात. पुराव्यांतल्यान जीं देवळां पुर्तुगेजांनीच मोडून उडयिल्ल्याचें सिद्ध जातलें तांचे पुनर्बांधणीची प्रक्रिया सरकारा कडल्यान सुरू जातली अशेंय मंत्री फळदेसाय हांणी सांगलें.
मजगतीं, गोंयचेर सुमार 450 वर्सां राज्य केल्ल्या पुर्तुगेजांनी गोंयांतली संस्कृती नश्ट करपाचो यत्न केलो. ते खातीर तांणी खूबशा हिंदू देवांचीं देवळां मोडून थंय चर्ची उबारल्यो. ताका लागून हिंदू धर्मियांक आपलो देव घेवन मूळ सुवाती सोडच्यो पिडल्ल्यो. हातूंतल्यान लोकांचेंय स्थलांतर जालें. पुर्तुगेजांनी जीं देवळां मोडून उडयल्यांत तीं देवळां भाजप सरकार परतून बांदतले अशी घोशणा मुख्यमंत्री डॉ. प्रमोद सावंत हांणी फाटल्या अर्थसंकल्पीय अधिवेशनांत केल्ली.
तशेंच ते खातीर कोट्यांनी रुपयांच्या निधीचीय तरतूद करून दवरल्या. मुख्यमंत्र्याची ही घाेशणा सत्यात देंवोवपा खातीर पुरातत्व आनी पुराभिलेख खात्यान फाटल्या कांय म्हयन्यां सावन पुर्तुगेजांनी मोडून उडयिल्ल्या देवळांची वळेरी तयार करपाचें काम सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
