भांगरभूंय | प्रतिनिधी
तापमान देंवता, शीं पडपाक सुरवात
पणजी : पुराय देशांतल्यान मॉन्सून परतलाे. येता ते चार दीस हवामान नितळ आसतलें. तापमानांत 2 अंशांनी घट जातली. हाका लागून शीं पडटलें असो हवामान खात्याचो अदमास आसा. मॉन्सून पुराय देशांतल्यान परतलाे अशी म्हायती पणजे हवामान खात्याचे मुखेली राहुल एम. हांणी दिली.
दिवाळेक शीं आसताच, हे खेपे दिवाळे पयलीं पावस आशिल्लो. पावसाक लागून नरकासूरांक आडखळ जाली. दिवाळीचे आदले दिसा मात हवामान नितळ आशिल्लें.
जून ते सप्टेंबर मेरेन मॉन्सूनाचो पावस आसता. उपरांत बिगर मोसमी पावस सुरू जाता. ऑक्टोबरच्या दुसऱ्या सप्तका मेरेन मॉन्सून परतता. ल्हवू ल्हवू मॉन्सूनाचो परतीचो प्रवास सुरू जाता. अंदूं मॉन्सूनाचो परतीचो प्रवास उसरां सुरू जालो. दिवाळीचे आदले दिसा पुराय देशांतल्यान मॉन्सून परतला. आतां मेरेन 98.4 मिमि बिगर मोसमी पावस जाला. हो पावस 4 इंच जाता. सरासरी परस हें प्रमाण 28.1 टक्के उणें आसा.
वाळपय बिगर मोसमी पावसाचें प्रमाण 314.4 मिमि (12 इंच) जालां. हेर वाठारां परस हें प्रमाण चड आसा. उण्या दाबाच्या पट्ट्याक लागून बिरेस्तार, शुक्रार तशेेच शेनवारा कांय वाठारांनी पावस पडलो. शेनवारा सांखळे पावसाचें प्रमाण चड आशिल्लें. हाका लागून दिवाळेंत पावसाचो हुस्को आशिल्लो. आयतारा हवामानांत बदल जालो. तापमान उणें जावपाचो अदमास आसा.
दिवाळेक शीं पडटा. अंदूं दिवाळी सदचे परस बेगीन आयल्या. तरी लेगीत दिवाळेंत तापमान देंवतलें असो अदमास आसा. पणजे चडांत चड तापमान 33.6 अंश जाल्यार उण्यांत उणें तापमान 24.1 अंश आशिल्लें. येत्या त्या तीन दिसांत उण्यांत उणें तापमान 23 अंश आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
