भांगरभूंय | प्रतिनिधी
कतारांत चालू आशिल्ले संवसारीक फुटबॉल सर्तीची पयली सेमी फायनल आयज आदलो वस्ताद अर्जेंटिना आनी क्रोएशिया ह्या पंगडां मदीं जातली.
क्रोएशियान क्वॉर्टरफायनलींत संवसारीक क्रमवारींत पयले सुवातेर आशिल्ल्या ब्राझिलाक हारोवन निमाण्या चारांनी पावला, जाल्यार अर्जेंटिनान सामकें उमळशीक वाडोवपी मॅचींत नॅदरलॅण्डाक पॅनल्टी शुटआवटांत हारोवन सेमी फायनलींतली सुवात निश्चीत केल्या.
क्रोएशिया पंगडान ब्राझिलाच्या नेमाराचें संवसारीक सर्त जिखपाचें सपन पयलींच भंगयलां. आतां ताच्या निशाण्याचेर लियॉनॅल मॅसी आसा. मॅसीच्या फुडारपणाखाला अर्जेंटिना 2014त जाल्ले सर्तीचे फायनलींत पाविल्लो. पूण, त्या वेळार ताका जर्मनी आड हार घेवची पडिल्ली. दुसरे वटेन क्रोएशिया फाटले खेपे फायनलींत पाविल्लो. पूण, ताका वस्तादपण जोडपाक जमूंक नाशिल्लें. ताका फ्रान्सा आड हार घेवची पडिल्ली.
अर्जेंटिनाक सेमी फानयलींत पावोवपाक मॅसीन मोलादीक योगदान दिलां. ताणें अजून मेरेन पांच मॅचींनी खेळटना चार गोल केल्यात.
दुसरे वटेन क्रोएशिया सेमी फायनली पयलीं शांत दिसता. तो आपले रणनितीचो खुलासो करपाक सोदिना.
अर्जेंटिनाच्या मॅसीसी आनी क्रोएशियाच्या लुका मोड्रीच हातूंतल्या एका खेळगड्याचें वस्तादपण मेळोवपाचें सपन भंगतलें. अर्जेंटिना कोपा अमेरिका किताब जिखून कतारांत पावला. फाटल्या दुसरे वटेन क्रोएशिया कसलोच गाजोवाजो करिनासतना चार वर्सां आदीं केल्ल्या प्रदर्शनाची पुनरावृत्ती करपाक सोदता. त्या वेळार गट पांवड्या वयले मॅचींत अर्जेंटिनाक लेगीत हारयिल्लो.
दुसरे वटेन अर्जेंटिनाची अंदूंचे सर्तीची सुरवात बरी जावंक नाशिल्ली. गट पांवड्या वयले आपले पयले मॅचींत ताका दुबळ्या सावदी अरेबिया आड 1-2 फरकान हार घेवची पडिल्ली. पूण, उपरांत जबरदस्त पुनरागमन करतना फुडल्यो दोनूय मॅची जिखून प्री-क्वॉर्टरफायनलींत सुवात मेळयली. प्री-क्वॉर्टरफायनलींत ताणें ऑस्ट्रेलिया पंगडाक हारयलो. जाल्यार क्वॉर्टरफायनलींत नॅदरलॅण्डाक पॅनल्टी शुटआवटांत हारयलो.
दुसरे वटेन मोड्रिचान क्रोएशिया वतीन एकूय गोल करूंक ना आनी गोल करपाक मजत लेगीत करूंक ना. तरी पूण, क्रोएशिया खातीर ताचे म्हत्व उणें जायना.
फाटले खेपे रशियेंत जाल्ले सर्तींत क्रोएशियाच्यो सगल्यो नॉकआवट मॅची अतिरिक्त वेळांत गेल्ल्यो. आनी अखेरेक फायनलींत फ्रान्सा आड हार घेवची पडिल्ली. कतारांत लेगीत ताणें प्री-क्वॉर्टरफायनलींत आनी क्वॉर्टरींत वळेरेन जपान आनी ब्राझिल ह्या पंगडांक पॅनल्टी शुटआवटांत हारयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
