भांगरभूंय | प्रतिनिधी
मुख्यमंत्री डॉ. सावंत हांचें परतून स्पश्टीकरण
भांगरभूंय I प्रतिनिधी
पणजी : सरकारी मुळाव्यो शाळा बंद करपा विशीं कसलोच निर्णय राज्य सरकारान घेवंक ना. वा तशें जाहीर लेगीत करूंक ना. ज्या शाळांनी विद्यार्थ्यांची संख्या उणी आसा, अशो शाळा लागसारच्या शाळांनी विलीन करपाचो सरकाराचो विचार आसा. पालक, शिक्षकांक विस्वासांत घेवनूच हाे निर्णय घेतले, अशें मुख्यमंत्री डॉ. प्रमोद सावंत हांणी बिरेस्तारा पत्रकारां कडेन उलयतना स्पश्ट केलें.
एक शिक्षकी तशेंच विद्यार्थ्यांची संख्या उणी आशिल्ल्या 294 सरकारी मुळाव्या शाळांचे सरकार विलिनीकरण करतले, अशी बातमी दिसाळ्यांनी उजवाडाक आयले उपरांत राज्यांतल्या कांय वाठारांतले पालक, तशेंच विरोधी पक्ष आक्रमक जाल्ले. खाजगी संस्थांच्या हिता खातीरूच सरकार मुळाव्यो शाळा बंद करता, असो आरोप विरोधकां कडल्यान सुरू जाला.
पेडणें, सत्तरी ह्या म्हालांतल्या पालकांनी भागशिक्षणाधिकाऱ्यांची भेट घेवन विलिनीकरण जावचें न्हय, अशें निवेदन शिक्षण खात्याक सादर केल्लें.
हे फाटभुंयेर, पत्रकारांनी परतून एकदा ह्याच विशया वयल्यान मुख्यमंत्र्यांक विचारले, तेन्ना तांणी सरकारी मुळाव्यो शाळा बंद करचे नात, वा ते विशीं कसलोच निर्णय घेवंक ना, अशें तांणी स्पश्ट केलें.
मजगतीं, रेमेडियल क्लासेसच्या विद्यार्थ्यांकूय माध्यान्ह आहार दिवपाचो विचार शिक्षण खात्यान सुरू केला. ऑक्टोबर मेरेन हे विशीं निर्णय घेतले, अशें मुख्यमंत्र्यान सांगलें.
मुळाव्या शाळांनी बेगिनूच शिक्षक भरती
सरकारी मुळाव्या शाळांनी शिक्षकांची भरती प्रक्रिया बेगिनूच सुरू करतले, अशें मुख्यमंत्री डॉ. सावंत हांणी बिरेस्तारा जाहीर केले. फाटल्या जायत्या वर्सां पसून राज्यांत मुळाव्या शिक्षकांची भरती जावंक ना. ताका लागून जायते जाण नोकरेची वाट पळयत आसतना मुख्यमंत्र्यान ही घोशणा केल्ल्यान डीएड पदवी घेतिल्ल्या तरणाट्यां मदीं आस्त निर्माण जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
