भांगरभूंय | प्रतिनिधी
म्हालेखापालांच्या अहवाला प्रमाण 48 शाळांनी 71 चड शिक्षक
भांगरभूंय I प्रतिनिधी
पणजी : मुळावें शिक्षण योग्य तरेन ल्हान भुरग्यांक मेळचें, हे खातीर विद्यार्थी आनी शिक्षक हांच्या प्रमाणांत ताळमेळ आसपाची गरज आसा. ज्या शाळेंत चड विद्यार्थी आसात, थंय चड शिक्षकांची गरज आसता. ज्या शाळांनी उणे विद्यार्थी आसात, त्या शाळांनी उणे शिक्षक आसपाक जाय. गोंयांत मात विद्यार्थी आनी शिक्षकांच्या प्रमाणात कसलोच ताळमेळ ना. विधानसभेंत दिल्ले आंकडेवारीचो विचार केलो जाल्यार हो निश्कर्श सहज काडपाक येता.
गोंयांत 719 मुळाव्यो (सरकारी प्राथमीक) शाळा आसात. हातूंत 33 शाळांनी 5 परस उणे विद्यार्थी आसात. 27 शाळांनी फक्त एकूच शिक्षक आसा. पांच परस उणे विद्यार्थी आसप वा एक शिक्षकी शाळां परस विद्यार्थी – शिक्षक प्रमाणांतली तफावत ही गंभीर गजाल आसा. आमदार मायकल लोबो हांणी विधानसभेंत विचारिल्ल्या लेखी प्रस्नाचेर मुळाव्या शाळांतले विद्यार्थी आनी शिक्षकांचो आंकडो हाची म्हायती दिल्या.
लेखी जापेंत दिल्ले म्हायती प्रमाण विद्यार्थी आनी शिक्षक हांच्या प्रमाणा विशीं कसलेंच धोरण सरकारा कडेन ना. ज्या शाळांनी चड विद्यार्थी आसात आनी शिक्षकांचो आंकडो उणो आसा, त्या शाळांनी शिक्षणा विशीं आडखळी येवप सभावीक आसा. दरेकी म्हालांतल्या शाळांनी शिक्षकांच्या तफावतीची उदाहरणां दिसून येतात.
गोंय हें तुळेंत ल्हान राज्य आसा. एका शाळेंत चड शिक्षक आसले जाल्यार तांची वेवस्था चड विद्यार्थी आशिल्या लागसारच्या शाळेंत करप शक्य आसा. शेजारच्या गांवांतल्या शाळेंत लेगीत तांची बदली करप शक्य आसा. पूण हे विशीं कोणूच गंभीरपणान घेना. म्हालेखापालांच्या अहवालांत लेगीत एक शिक्षकी शाळां सयत चड शिक्षक आशिल्या शाळांची आंकडेवारी दिल्या.
पेडणें म्हालांत 27 शाळांनी विद्यार्थ्यांचे तुळेंत चड शिक्षक आसात. तोर्श्यां शाळेंत 29 विद्यार्थ्यां खातीर चार शिक्षक आसात. ते भायर मोरजी, कोरगांव, पार्सेकरवाडो हरमल हांगाचे शाळेंत 10 ते 15 विद्यार्थी आसात. शिक्षक मात तीन आसात.
बार्देस म्हालांत 19 शाळांनी विद्यार्थी तशेंच शिक्षकांच्या प्रमाणा मदीं बरीच तफावत दिसता. दिवचल म्हालांत फाळवाडाे – कुडणेंच्या शाळेंत 27 विद्यार्थ्यां खातीर चार शिक्षक आसात. कुडणें लागसारच्या दुसऱ्या शाळेंत 78 विद्यार्थ्यां खातीर चार शिक्षक आसात. दिवचल म्हालांत 10 शाळांनी विद्यार्थी आनी शिक्षकां मदीं बरीच तफावत दिसून येता.
सत्तरींत हिवरे शाळेंत 47 विद्यार्थ्यां खातीर चार शिक्षक आसात. होंडाच्या एके शाळेंत 66 विद्यार्थ्यां खातीर तीन शिक्षक आसात. ठाणेंच्या एके शाळेंत 68 विद्यार्थ्यां खातीर चार शिक्षक आसात.
तिसवाडींत चिंबला 60 विद्यार्थी आशिल्लें शाळेंत सात शिक्षक आसात. खडपावाडाे – कुमारजुंवेंतल्या शाळेंत 141 विद्यार्थी आसून फक्त पांच शिक्षक आसात. सांगें म्हालांत सांवड्डेंच्या शाळेंत 39 विद्यार्थ्यां खातीर 5 शिक्षक आसात जाल्यार वाडेंतले शाळेंत 92 विद्यार्थी आसून फक्त चार शिक्षक आसात.
मुरगांव म्हालांत वाडेनगरांतले शाळेंत 41 विद्यार्थ्यां खातीर पांच शिक्षक आसात.
धारबांदोडें म्हालांत प्रतापनगर शाळेंत 15 विद्यार्थी आनी तीन शिक्षक आसात. दयानंदनगर हांगा 46 विद्यार्थी आसतना फक्त दोन शिक्षक आसात.
केपें म्हालांत मोरपिर्ला शाळेंत 74 विद्यार्थ्यां खातीर दोन शिक्षक आसात फातर्पा 50 विद्यार्थ्यां खातीर तीन शिक्षक आसात.
साश्ट म्हालांत सां जुझे द आरियल शाळेंत 71 विद्यार्थ्यां खातीर दोन शिक्षक आसात. हावजींग बोर्ड, दवर्लेंच्या शाळेंत 55 विद्यार्थ्यां खातीर 5 शिक्षक आसात. दवर्लेंतल्या दुसऱ्या शाळेंत 60 विद्यार्थ्यां खातीर तीन शिक्षक आसात. एकाच गांवांतल्या शाळांनी लेगीत विद्यार्थी – शिक्षकांच्या प्रमाणांत तफावत दिसता.
म्हालेखापालांच्या अहवालांत दखल
म्हालेखापालांच्या अहवालांत लेगीत चड शिक्षक आशिल्या शाळांची आंकडेवारी आसा. राज्यांतल्या 48 शाळांनी 71 शिक्षक चड आसात. 48 मुळाव्या शाळांनी 193 शिक्षक आसात. शिक्षण हक्क कायद्याच्या मार्गदर्शक तत्वां प्रमाण ह्या शाळांनी 122 शिक्षक आसपाची गरज आशिल्ली.
तोरशेंः 29 विद्यार्थी – शिक्षक 4
पार्सेकरवाडो हरमलः 15 विद्यार्थी – शिक्षक 3
कुडणेंः 27 विद्यार्थी – शिक्षक 4
कुडणें,शाळा-2ः 78 विद्यार्थी – शिक्षक 4
सत्तरी हिवरेंः 47 विद्यार्थी – शिक्षक 4
होंडा शाळा-1ः 66 विद्यार्थी – शिक्षक 3
ठाणेंः 68 विद्यार्थी – शिक्षक 4
चिंबलः 60 विद्यार्थी – शिक्षक 4
कुमारजुवेंः 141 विद्यार्थी – शिक्षक 5
सांगें-सांवड्डेंः 39 विद्यार्थी - शिक्षक 5
वाडेंः 92 विद्यार्थी – शिक्षक 4
मुरगांव-वाडेनगरः 41 विद्यार्थी – शिक्षक 5
धारबांदोडेंः 15 विद्यार्थी – शिक्षक 3
दयानंदनगरः 46 विद्यार्थी – शिक्षक 2
मोरपिर्लाः 74 विद्यार्थी – शिक्षक 2
फातर्पाः 50 विद्यार्थी – शिक्षक 3
साश्टः सां जुझे द आरियलः 71 विद्यार्थी – शिक्षक 2
हावसिंग बोर्ड दवर्लीः 55 विद्यार्थी – शिक्षक 5
दवर्ली शाळा 2ः 60 विद्यार्थी – शिक्षक 3
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.