मुरगांव पालिकेचे तिजोरेंत खडखडाट

भांगरभूंय | प्रतिनिधी

सुरक्षा ठेव खात्यांतले 40 लाख काडपाचो निर्णय

वास्को: मुरगांव पालिकेचे तिजोरेंत खडखडाट पडिल्ल्यान कर्मचारी, निवृत्त पगारधारक आनी दीसवड्या वयले कामगार हांचो ऑक्टोबर म्हयन्याचो पगार दिवपा खातीर सुरक्षा ठेव खात्यांतले 40 लाख काडपाचो निर्णय मुगांव पालिकेन घेतला. ‘अ’ वर्गाच्या पालिकेचे तिजोरेंत खडखडाट पडपा फाटलें कारण कितें आसुये हे विशीं सेगीत प्रतिक्रिया आयकूंक मेळटात.

पालिकेची जी थकबाकी आसा, ती व्हड मोहीम राबोवन वसूल करपाची गरज आसा. मजगतीं, कांय वेळा मोहीम राबयतात, गरजे पुरती थकबाकीची रक्कम वसूल जाली की परतून सामसूम जाता अशें चित्र दिसता. कसलेंच नियंत्रण नाशिल्ल्यान मुरगांव पालिकेचो भंयूच नश्ट जाल्ल्याचो दावो नगरसेवक दीपक नायक हांणी केलो.

मुरगांव पालिकेक पगारा खातीर सेगीत धांवपळ करची पडत आशिल्ल्याचें चित्र फाटल्या कांय म्हयन्यां सावन पळोवंक मेळटा. आपलो म्हयन्याचो पगार केन्ना हातांत पडटलो हाची वाट कर्मचारी आनी निवृत्त पगारधारकांक पळोवचो पडटा. ऑक्टोबर म्हयन्याचो पगार तांच्या हातांत अजून पडिल्लो ना. केन्ना मेळटलो ते सांगूं येना अशें कामगार म्हणटात.

कर्मचारी, निवृत्त पगारधारक, दीसवड्या वयले कामगार हांचो पगार दिवपा खातीर रक्कम नाशिल्ल्याचें लेखा विभागान कळयिल्लें. कर्मचाऱ्यां खातीर अदमाशेक 70 लाख, निवृत्त पगारधारकां खातीर अदमाशेक 14 लाख, दिसवड्या वयल्या कामगारां खातीर अदमाशेक 15 लाख रुपया अशे सुमार 99 लाख रुपया पगारा खातीर मुरगांव पालिकेक म्हयन्याक लागतात. पूण सद्या मुरगांव पालिकेची अर्थीक स्थिती बिकट जाल्ल्यान इतली व्हड रक्कम कशी आनी खंयच्यान हाडची हो प्रस्न आशिल्लो. ताका लागून हो प्रस्न सोडयतना सुरक्षा ठेव खात्यांतले 40 लाख रुपया काडप आनी सरकारा कडल्यान पगार अनुदान मेळ्ळे उपरांत 40 लाख रुपया परतून त्या खात्यांत जमा करपाचो निर्णय घेतला.

मुरगांव पालिकेक मेळपी ऑक्ट्रोय बंद जाल्ल्यान मुरगांव पालिकेची अर्थीक स्थिती इबाडिल्ल्याचो दावो नगरसेवक दीपक नायक हांणी केलो. पयली ऑक्ट्रोय रुपान मुरगांव पालिकेक सुमार स कोटी वर्साक मेळटाले. ताका लागून मुरगांव पालिका सगल्या पालिकां मदीं बळिश्ट आशिल्ली. पूण सरकारान आपले कडेन ऑक्ट्रोय वळयिल्ल्यान मुरगांव पालिके मुखार अर्थीक अडचण निर्माण जाल्या. तेच प्रमाण सातव्या वेतन आयोगाक लागून पगारांत वाड जाल्ल्यान मुरगांव पालिकेक दुपेटीन रक्कम पगारा खातीर खर्च करचो पडटा अशें नायक हांणी सांगलें.

मुरगांव पालिकेच्या मालकीच्या दुकानांनी जे भाड्यान म्हणून आशिल्ले तांणी ती दुकानां परतून भाड्यान दिल्यात. ते भाडेकार म्हयन्यां खातीर दवरिल्ल्या भाडेकारा कडल्यान दुपेटीन भाडें घेतात. जाल्यार पालिकेक वर्साक फक्त पांच हजार रुया भाडें म्हूण फारीक करतात. जे मुरगांव पालिकेचे भाडेकार आसात तांकां बाजार भावा प्रमाण भाडें लागू करपाची गरज आसा. ते नदरेन सरकार यत्न करीत आसा. तो कायदो आयल्यार पालिका स्वयंपूर्ण जावपाक वेळ लागचो ना असो दावो दीपक नायक हांणी केलो.