भांगरभूंय | प्रतिनिधी
भांगरभूंय । प्रतिनिधी
मुरगांवः मुरगांव बंदरांतल्यान वास्को शारांतल्यान कोळसो आनी बॉक्सायडची येरादारी करपी ट्रक मुरगांव आनी सडा वाठारांतल्या कांय समाज वावुरप्यांनी सेगीत 6व्या दिसा आडायले. मंगळाराक वास्कोचो आमदार कृष्णा साळकार आनी मुरगांवचो आमदार संकल्प आमोणकार हांणी बंदराचे 9 नंबराचे गेटी भायर आंदोलकां कडेन चर्चा करून बॉक्सायड येरादारीचेर तोडगो काडपाचो यत्न केलो. मात जो मेरेन मुरगांव पोर्ट ट्रस्ट, दक्षीण गोंय जिल्होधिकारी आनी मुरगांवचो उपजिल्होधिकारी कोळसो आनी बॉक्सायडचे ट्रक वास्को शारांतल्यान व्हरपाक बंदी घालतले अशें लेखी आश्वासन दिनात तो मेरेन गेट नबंर 9 कडल्यान फाटीं सरचे नात अशें सांगलें. आमदार साळकार आनी आमोणकारान मुख्यमंत्री डॉ प्रमोद सावंत हांच्या वांगडा बसका घेवन ठोस निर्णय घेतलें अशें समाज वावुरपी शंकर पोळजी आनी सूरज चोडणकार हांका सांगलां.
मुरगांव बंदरांतल्यान कोळसो आनी बॉक्सायडच्या ट्रकांक वास्को शारांतल्यान वचपाक कायम बंदी घालपाक जाय. राज्य सरकार जो मेरेन व्हो निर्णय घेना तो मेरेन गेट नंबर 9 कडेन आंदोलन सुरू उरतलें अशें पोळजी हांणी सांगलां. 9 नंबराचे गेटींत आशिल्ल्या बॉक्सायड ट्रकां विशीं तोडगो काडपा खातीर आमदार आमोणकार आनी साळकार हांणी शंकर पोळजी, सूरज चोडणकार, सुशांत नायक, प्रतिक पालेकार, गौतम बोदाडे, शांतराम पराडकार आनी हेरां वांगडी उलोवणी केलीं. मात तांणी सरकारा कडल्यान कोळसो आनी बॉक्सायाडाची येरादारी करपी ट्रकांक वास्को शांरातंल्यान वचपाक बंदी घालपाची मागणी केल्या.
मुख्यमंत्र्यां कडेन एक- दोन दिसांत बसका घेवन तोडगो काडपाचो यत्न करतले. मुरगांव बंदरांतल्या जावपी कोळसो प्रदूशणाक म्हजो लेगीत विरोध आसा अशें संकल्प आमोणकारान पत्रकारां कडेन उलयतना सांगलें. प्रदूशणा संबंदी आपणे अदानी कंपनी, मुरगांव पोर्ट ट्रस्ट अधिकाऱ्यां वांगडा उलोवणी केल्यांत प्रदूशण नियंत्रणाक हाडपा खातीर पावलां घालपाचें आस्वासन तांणी आपल्याक दिलां. मात अदानी आनी मुरगांव पोर्ट ट्रस्टाचेर अर्थीक खर्चाचें वजें पडटलें अशें तांणी आपल्याक सांगलां अशें आमोणकारान सांगलें.
फाटल्या सप्तका पसून मुरगांव आनी सडा हांगच्या समाज वावुरप्यांनी मुरगांव बंदरांतल्यान जावपी कोळसो आनी बॉक्सायड ट्रकांची येरादारी आडयल्या. आंदोलन करतात ताचों आपलो पुराय तेंको आसा अशें आमदार कृष्णा साळकारान पत्रकारांक सांगलें. वास्को शारांतल्यान ह्या ट्रकांक वचपाक बंदी घालपाक जाय अशी आपलीय मागणी आसा अशें तांणी स्पश्ट केलें. सध्या बंदरांतले 9 नंबराचे गेटीत आशिल्ल्या बॉक्सायड टॅकां विशीं निर्णय घेवपाची गरज आसा. आंदोलकांनी ते खातीर आपलें आंदोलन फाटी घेवचें अशी विनवणी साळकार हांणी केल्या. मंगळाराक बंदरांतले 9 नंबराचे गेटी कडेन अनूचीत प्रकार जावचो न्हय हे खातीर मुरगांवचो पुलीस निरीक्षक राघोबा कामत आनी वोस्कोचो पुलीस निरीक्षक कपील नायक थंय पुलीस पंगडा सयत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
