भांगरभूंय | प्रतिनिधी
गिरीश चोडणकारः एसआयटीक उलो, मुख्यमंत्र्यांकूय आव्हान
भांगरभूंय । प्रतिनिधी
पणजीः काँग्रेस पक्षाचे आदले प्रदेशाध्यक्ष गिरीश चोडणकार हांणी साल्वादोर द मुंद पंचायत वाठारांतलीं जमीन बळकावपाच्या प्रकरणाचो खुलासो केला. ह्या प्रकरणांत एक मंत्री घुस्पला, अशें तांणी म्हणलां. मुख्यमंत्र्याच्या चेपणाक भिये नासतना अशा प्रकरणांत घुस्पल्ल्या मंत्र्यांचीं नांवां सांगचीं, असो उलो एसआयटीक मारला. तशेंच मुख्यमंत्र्यांनूय संबंदीत मंत्र्याचें नांव उक्तें करचें, अशें आव्हान दिलां.
हे संबंदांत 20 जुलयाक पर्वरी पुलीस स्टेशनांत हे जमनीची पॉवर ऑफ अॅटर्नी सेल्स फ्रांसिस्को फर्नांडीस हांणी पुलिशेंत कागाळ दाखल केल्या. दक्षता विभाग आनी पंचायतींत लेगीत हे संबंदांत कागाळ केल्ली, पूण हे कागाळीची पुलिसांनी चवकशी करूंक ना आनी ती एसआयटी कडेनूय दिवंक ना, असो आरोप चोडणकार हांणी केलो. राजकी चेपणा खाला पुलिसांनी ही कागाळ चिड्डिल्या. हे कागाळेंत अँथनी मॅन्युएल रिबेलो आनी हेझल सेवेरिनो मेंडोंन्सा हांचे मालकीची 3,250 चौखण मिटर सर्व्हे नंबर 221/ 25 जमनीचो संदर्भ आसा. मुंबयच्या वेवसायिकान ह्या प्लॉटाचेर आदींच बांदकाम सुरू केलां, अशी म्हायची चोडणकार हांणी दिली.जमीन बळकावपाच्या प्रकरणांचो एसआयटी वरवीं चवकशी करपाचो मुख्यमंत्र्यांचो फक्त एक स्टंट आसा. ह्या बेकायदो प्रकरणांत घुस्पल्ल्या राजकारण्यांक सरकारी पदां वयल्यान काडपाचें तशेंच कॅबिनेट मंत्र्याक मंत्रीमंडळांतल्यान वगळपाचे आपले मागणे कडेन मुख्यमंत्री डॉ. सावंत कित्याक लक्ष दिना, असोय प्रस्न चोडणकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
