भांगरभूंय | प्रतिनिधी
पणजी : मुख्यमंत्री डॉ. प्रमोद सावंत हांणी केंद्रीय मंत्री नितीन गडकरी हांची भेट घेवन रस्ते तशेंच म्हामार्गाचेर चर्चा केली. शेनवारा येरादारी मंत्री मॉवीन गुदिन्हो हांणी गडकरी हांची भेट घेतिल्ली.
ई मोबीलीटी आनी हरीत उर्जा वाठारांत राज्याक मजत करपाचें आस्वासन तांणी दिलां.
काँग्रेसीच्या आठ आमदारांच्या भाजप प्रवेशाक लागून राज्यांत मंत्रीमंडळ बदलाच्यो चर्चा अदीं मदीं सुरू आसता. शेनवारा भलायकी मंत्री विश्वजीत राणे हांणी दिल्लींत केंद्रीय गृह मंत्री अमीत शाह हांची भेट घेतली. हे भेटी उपरांत परतून तर्कवितर्कांक सुरवात जाल्या. हाचे उपरांत आतां मुख्यमंत्री डॉ. प्रमोद सावंत हांणी नितीन गडकरी हांची भेट घेतल्या.
विश्वजीत – अमीत शाह भेटी पयली मुख्यमंत्री डॉ. प्रमोद सावंत हांणी हरियाना हांगा चिंतन शिबिरांत हाजेरी लायिल्ली. केंद्रीय गृह मंत्री अमीत शाह हांच्या फुडारपणा खाला चिंतन शिबीर जालें. हाचे उपरांत केंद्रीय मंत्री नितीन गडकरी हांणी गोंयाक भेट दिली. येरादारी मंत्री मॉवीन गुदिन्हो हांणी गडकरी हांची भेट घेवन येरादारीच्या विशयाचेर चर्चा केली. ह्याच काळांत भलायकी मंत्री विश्वजीत राणे हांणी दिल्लींत गृह मंत्री अमीत शाह हांची भेट घेतली. अमीत शाह हांचे कडेन भलायकी मंत्रीपद ना. तरी लेगीत आचकीत विश्वजीत राणे हांणी अमीत शाह हांची भेट घेतिल्ल्यान भेटी विशीं उमळशीक वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
