भांगरभूंय | प्रतिनिधी
पणजीः मुख्यमंत्री डॉ. प्रमोद सावंत हांणी आयज जीएमसींत हस्तक्षेप केले उपरांत भलायकी मंत्री विश्वजीत राणे हांचे विरुध्द सुरु केल्ले आंदोलन दोतोरांनी फाटीं घेतले. जीएमसींतल्या दोतोरांनी सरकार कडेन केल्ल्यो सातूय मागण्यो मान्य करतले अशें पत्रकारां कडेन उलयतना मुख्यमंत्री डॉ. सावंत हांणी सांगलें.
जीएमसींत बी-12 इंजेक्शन घेवपाक आयिल्ल्या दुयेंती कडेन सारकें वागूंक नाशिल्ल्यान भलायकी मंत्री विश्वजीत राणे हांणी मुखेल वैजकी अधिकारी डॉ. रुद्रेश कुट्टीकार हांचो सगळ्यां मुखार अपमान केल्लो. हे विशीं राज्यांतले विरोधी पक्ष आक्रमक जाले उपरांत ऑल इंडिया मेडिकल असोसिएशन (एफएआयएमए) आनी इंडियन मेडिकल असोसिएशनाच्या (आयएमए) गोंय फांट्यानय आक्रमक भुमिका घेतली. ह्या प्रकरणांत मुख्यमंत्री डॉ. सावंत हांणी 72 वरां भितर कारवाय केली ना जाल्यार देशभरांत निशेध करपाची शिटकावणी ह्या दोनूय संघटनांनी दिली आनी उपरांत जीएमसींच्या दोतोरांनी सोमारा सावन आंदोलन सुरू केले.
मंत्री राणे हांणी ज्या सुवातेर डॉ. कुट्टीकार हांचो अपमान केल्लो त्याच सुवातेर येवन तांची माफी मागची अशी मागणी तांणी केल्ली. ते उपरांत निशेध करपी दोतोरांच्या शिश्टमंडळान सोमारा सांजवेळा मुख्यमंत्र्याची भेट घेतली.
दोतोरांचें आंदोलन तापपाची शक्यताय मतींत दवरून आयज दनपारां मुख्यमंत्री डॉ. सावंत हांणी जीएमसींत वचून डीन डॉ. बांदेकार आनी हेर दोतोरां कडेन बसका घेतली. बसके वेळार तांणी केल्ल्यो सातूय मागण्यो पुराय करतले अशें आमी तांकां आश्वासन दिलां. हाचे फुडें हॉस्पिटलांत व्हिडियोग्राफीचेर बंदी घालतले, व्हीआयपी पद्दत बंद करतले, दोतोरांच्या सुरक्षे खातीर जीएमसी वाठारांत आनीक 50 पुलीस अधिकाऱ्यांची नेमणूक जातली, थंयच्या पुलीस स्टेशनांत उपनिरिक्षकांची नेमणूक जातली तशेंच फुडाराक जीएमसींत अशी घडणूक घडची न्हय हे खातीर शिस्तबद्ध समिती स्थापन करतले अशेंय ह्या वेळार मुख्यमंत्र्यान सांगलें.
मजगतीं, मुख्यमंत्र्यांच्या हस्तक्षेपा उपरांत आंदोलन फाटीं घेतले उपरांत जीएमसींत येवपी दरेका दुयेंतीक व्हीआयपी हस्तक्षेपा बगर योग्य आनी उच्च दर्जाची भलायकी सेवा मेळटली अशें आश्वासन दोतोरांनी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
