भांगरभूंय | प्रतिनिधी
भांगरभूंय । प्रतिनिधी
काणकोणः नेत्रावती एक्स्प्रेस, मत्स्यगंधा एक्स्प्रेस आनी गांधीधान एक्स्प्रेस रेल्वेंक काणकोण रेल्वे स्टेशनांत थोड्या वेळाचो थांबो दिवपाची मागणी मानून घेतली ना जाल्यार रेल रोको आंदोलन करपाची शिटकावणी काणकोणच्या जेश्ठ नागरीक मंचान दिल्या. मंचाचे हालींच जाल्ले बसकेंत रेल रोको करपाचो थाराव पास केला अशी म्हायती मंचाचो अध्यक्ष मान्युएल मार्टिन हांणी दिल्या.
काणकोण रेल्वे स्टेशनाचेर मुखेल रेल्वेंक थांबो दिवपाची मागणी वेगवेगळ्या बिगर सरकारी संस्था, ज्येश्ठ नागरीक मंच हांणी जायत्या फावट करून लेगीत कोंकण रेल्वे म्हामंडळ ताका कसलोच प्रतिसाद दिना. ताका लागून रेल रोको आंदोलन हो आमचे सामकार आता एक पर्याय उरला अशें मार्टिन हांणी सांगलें. काणकोणकारांक मुखेल रेल्वेन वचपा खातीर कारवार ना जाल्यार मडगांवां वच्चें पडटा. साबार रेल्वे प्रवाशांक तें परवडना. ताका लागून थोड्या वेळा खातीर थांबो दिवपाची आमची मागणी आसा अशें तांणे सांगलें.
कोवीड म्हामारी पयलीं ह्या तीन रेल्वे काणकोण रेल्वे स्टेशनाचेर थांबताल्यो. काणकोण रेल्वे स्टेशनार कोवीड चांचणी करपाची वेवस्था नाशिल्ल्यान थांबो दिवप शक्य ना अशें कोंकण रेल्वे अधिकारी सांगतात. आतां कोवीड निर्बंध पाळनात आनी कोंकण रेल्वे मार्गा वयल्यो सगळ्यो रेल्वे सुरू जाल्यात. मात काणकोण स्टेशनाचेर पयलीं भशेंत थांबो दिवपाचे अजून सुरू केल्लें ना. हें थांबे परत सुरू करचे इतलीच आमची मागणी आसा. मात ताचे कडेन कोंकण रेल्वे अजून लक्ष दिना अशें मार्टिन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
