मुकूंद त्रिकन्नाड क्रिकेट सर्तींत भाटीकार हायस्कूल वस्ताद

मुकूंद त्रिकन्नाड क्रिकेट सर्तींतल्या जैतिवंत भाटीकार हायस्कूल पंगडा वांगडा मान्सेत. मोहित रेडकाराचो भोवमान करतना आमदार दिगंबर कामत

भांगरभूंय | प्रतिनिधी

भांगरभूंय । खेळां मेज
पणजीः भाटीकार मॉडेल हायस्कूलान किंग्ज हायस्कूल ऑफ सां जो एरिएल पंगडाक 10 विकेटींनी हारोवन 20व्या मुकूंद त्रिकन्नाड अंडर- 16 आंतर शालेय क्रिकेट सर्तीचें वस्तादपण मेळयलें. सर्तीचें आयोजन मडगांव क्रिकेट क्लबान मडगांवच्या डॉ राजेंद्र प्रसाद स्टेडियमाचेर केल्लें.
किंग्ज हायस्कूलान टॉस जिखून पयलीं बॅटिंग करून 39.3 ओव्हरींत 215 धांवड्यो केल्यो. व्यंकट चिगुरुपातीन 50 जाल्यार आराध्य गोयलान 36 धांवड्यांचें योगदान दिलें. भाटीकार पंगडा वतीन शंतनू नेवगी येसस्वी बॉलर थारलो. ताणे 46 धांवड्यांत 4 विकेटी घेतल्यो. ओम नायकाक एक विकेट मेळ्ळी.
किंग्जाच्या आव्हानाचो फाटलाव करतना यश कसवणकार (नाबाद 107) आनी शंतनू नेवगीच्या (नाबाद 81) हाचे नाबाद 216 धांवड्याचे भागिदारीच्या नेटार 34.2 ओव्हरींत भाटीकार हायस्कूलान जैत मेळयलें. शंतनू नेवगीक मॅन ऑफ दी मॅच आनी उत्कृश्ट बॉलर म्हणून वेंचून काडलें. दामोदर विद्यालयाच्या निसर्ग नागवेकाराक उत्कृष्ठ बॅट्समन म्हणून वेंचलें.
फायनलीक मुखेल सोयरो म्हणून आमदार दिगंबर कामत हाजीर आशिल्ले. तांचे ह्स्तुकीं जैतिवंत पंगडाक करंड भेटयलो. ह्या वेळार भारताचो आदलो खेळगडो प्रवीण आमरे, सर्त पुरस्कृत करपी दिनेश त्रिकन्नाड, गोंय क्रिकेट असोसिएशनाचो सचीव रोहन गांवस देसाय हाजीर आशिल्ले. ह्या वेळार रणजी क्रिकेटीयर मोहित रेडकार हांचो दिगंबर कामत हांचे हस्तुकी रणजी सर्तींत केल्ले अश्टतासी कामगिरी खातीर भोवमान केलो. मडगांव क्रिकेट क्लबाचो सचीव आदित्य आंगलेन सूत्रसंचालन करून निमाणे उपकार मानले.