भांगरभूंय | प्रतिनिधी
इंडियन प्रिमियर लिगेच्या 2023च्या हंगामा खातीर ‘मिनी ऑक्शना’चे तारखेची घोशणा जाली. ही पावणी 23 डिसेंबराक कोच्चींत जातली. आयपीएलाच्या पंगडांनी पावणे पयलीं कायम दवरिल्ल्या खेळगड्यांची आनी मेकळे केल्ल्या खेळगड्यांची वळेरी दिवची पडटली. आयपीएलाच्या सगल्या पंगडांक 15 नोव्हेंबर मेरेन वळेरी सादर करपाचो वेळ दिला. हे मजगतीं, मुंबय इंडियन्स आनी चेन्नय सुपरकिंग्स ह्या पंगडांनी आपल्या खेळगड्यांची वळेरी दिल्या.
आयपीएलांतलो सगल्यांत येसस्वी पंगड मुंबय इंडियन्सान नव्या हंगामा पयलीं व्हड बदल करपाचो निर्णय घेतला. मुंबय इंडियन्सान आपल्या अणभ खेळगड्यांतलो एक किरोन पोलार्डाक मेकळो करपाची निर्णय घेतला. तो 2010 सावन पंगडांत आशिल्लो. ताचे खेरीत पंगडान दोन विदेशी खेळगडे वॅस्ट इंडिजाच्या फॅबियन अॅलनाक आनी इंग्लंडाच्या टायमल मिल्साक मेकळो करपाचो निर्णय घेतला. स्वदेशी खेळगड्यां मदीं मयंक मार्कंडे आनी ऋतिक शौकीन हांकां भायरचो रस्तो दाखयला.
जाल्यार पंगडान रोहित शर्मा, डॅवाल्ड ब्रेव्हीस, सुर्यकुमार यादव, ईशान किशन, डॅनिएल सैम्य, जसप्रीत बुमरा, ट्रिस्टन स्टब्स, तिलक वर्मा, टिम डॅव्हीड आनी जोफ्रा आर्चर.
मजगतीं, आयपीएलाच्या इतिहासांतलो दुसरो सगल्यांत येसस्वी पंगड चेन्नय सुपरकिंग्सान लेगीत व्हड खेळगड्यांक मेकळे केल्यात. पंगडान इंग्लंडाच्या क्रिस जॉर्डन, न्युझिलॅण्डाच्या अॅडम मिल्ने आनी मिशेल सॅण्टनर हांकां मेकळे केल्यात. जाल्यार स्वदेशी खेळगड्यां मदीं नारायण जगदीसनाक मेकळो करपाचो निर्णय जाला. रॉबिन उथप्पा आनी अंबाती रायुडू निवृत्त जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
