भांगरभूंय | प्रतिनिधी
पावस आमच्या राज्याक नवो न्हय, तो दरवर्सा येता. जूनाच्या पयल्या वा दुसऱ्या सप्तकांत. मागीर सप्टेंबर अर्दो जालो काय परतता. मात हालींच्या कांय वर्सांनी सैमाचें हें चक्र बदल्लां. फाटलीं तीन वर्सां गोंयचो पावस नोव्हेंबर सोंप मेरेन पडला. मे म्हयन्यांत तो सुरू जाता. अर्थांत मिर्गाच्या मोसमा पयलीं वा उपरांत पडटा ताका आडोळो, आडवेळो, अवकाळी पावस म्हणटात. मात तो मिर्गा परस चड लुकसाण करता. कारण पावसाचें उदक व्हांवून वच्चें, म्हूण तयारी केल्ली नासता. घर शिंवपाचीं कामां चालू आसतात. जिणेंगरजेच्या वस्तुंची सांठवण जाल्ली नासता. पावसा पयलीं करुंया असो आळस करून सगलेच बेफिकीर बशिल्ले आसतात वा पावस सोंपलो म्हूण सगलेच सुसेगाद आसतात. तेन्ना नेमको हो पावस कोसळटा आनी जीण विस्कळीत करता. काल राज्यांत पडिल्ल्या पावसान नेमकें हेंच चित्र दाखयलें. हो फक्त ट्रेलरूच थारचो, सिनेमा सुरू जावचो न्हय, हे खातीर सरकारी यंत्रणांक, स्वराज्य संस्थांक पेंगट बांदून वावुरचें पडटलें.
राज्यांत काल सकाळीं साडेआठ ते सांजवेळा साडेपांच मेरेन पेडण्यां 6.33 इंच, म्हापश्यां 6.18, पणजे 3.18 जाल्यार मुरगांवां 2.95 इंच पावस पडलो. राज्यांत सरासरी पांच इंच पावस रकला म्हणूं येता. वेधशाळेन 26 मे मेरेन पावसाची शिटकावणी दिल्या. आयज, फाल्यां आॅरेंज अलर्ट, उपरांत 26 मे मेरेन यलो अलर्ट. तातूंत अंदूं पावसाची सरासरी पोरूं परस चड आसतली खंय. म्हणटकच सगल्यांनीच सादूर रावचें पडलें. काल दिवचल, म्हापशें, पेडणें वाठारांत लोकांक, वेपाऱ्यांक त्रास जाले. रस्त्यांचेर, बाजारांत उदक भरून उरलें. म्हापश्यां तर बांद फुटिल्ले भशेन उदक व्हांवतालें, ताचे व्हिडियो व्हायरल जाल्यात. म्हापश्यां- खोर्ले एकलो स्कुटर चलोवपी व्हांवून वचपाचो… उदक रस्त्याचेर आयलें ताका कारण गटारां नितळ करपाचें काम अजून चलता. व्हाळ- न्हंयांतलो चिखल उसपुपाचें काम दोन दिसां पयलींच सुरू जालां. झाडां बेणप अजून चालू आसा. काल सांठिल्ल्या उदकांत प्लास्टिकाच्यो बाटल्यो दिसताल्यो, हाचे वयल्यान उदकाचो हो सांवार कित्याक जालो, ताचो अदमास येतलो. हाका, आमी समाजूच जापसालदार आसात. आमचे बेशिस्तीक लागून प्लास्टिकाचो राकेस वाडला. कांय कडेन कुशिल्लो कोयर रस्त्यांचेर आयिल्ल्यान दुर्गंध पातळिल्लो. लोकांच्या घरांनी, दुकानांनी उदक घुसलें. पोरुंय दिवचल, सांखळे वाठारांत 2- 3 फावटी हुंवार आयिल्लो. तो नेमको कित्याक येता, ताचो अभ्यास जावंक नाका? उदक अमूकच जाग्यार कित्याक सांठून उरता, अंदूंच हांगा कित्याक उदक आयलें, ह्या सैमीक समस्यांचीं कारणां, ताचे वयले उपाय 60- 70 पावसाळे पळयिल्ल्यांक खबर आसतात. मात अणभवान केस धवे केल्ल्या ह्या जाणकारांचें कोण आयकताच अशें ना.
तशीं उदक सांठून उरपाचीं कारणां जायतीं. गटारांनी गेल्ली माती, फातर, प्लास्टीक कोयर, मातयेच्या जमनींचेर- उदक सांठवताले त्या जाग्यांचेर शिमिटाचें पॅच, पेवर्सांचें जाळें, इमारतींचें रान दिसता. मागीर उदक जिरतलें खंय? फक्त शारांचीच न्हय, तर उपनगरांची, गांवांचीय कांयशी अशीच स्थिती जाल्या. उदक तुंबून उरपाचे काय जागे आशिल्ले, ताची कोणाकूच बादा जायनाशिल्ली. पूण आतां थंय घरां, प्रकल्प बांदल्यात. म्हणटकच जागो नाशिल्ल्यान उदक मेळत थंय धांवता. दोंगरांचेरूय उदक जिरतालें, थंय आतां हावसिंग प्रकल्प उबे जाल्यात, फुडाराक जातले. थंयची माती झाडांची मुळां घट धरून दवरताली. पूण तीं झाडांच नाशिल्ल्यान आतां पालसणां घो जातात. पणजेच्या आल्तीन वाठारांत तर भयानक स्थितींत घरां उबीं आसात. तांचेर म्हापालिकेन बेगोबेग उपाय काडपाक जाय. प्लास्टीक कोयराची समस्या आमच्या राज्यांत फाटल्या 30 वर्सां सावन आसतली. 1990 च्या उत्तरार्धांत सगलें गोंयूच मुदार जायत गेलें. प्लास्टिकूय वाडलें. ताचो योग्य पद्दतीन विलो लावपाक स्वराज्य संस्थांक अपेस आयिल्ल्यान आयज तें व्हडली समस्या जालां. प्लास्टीक गटारां तुंबयता, मागीर उदक रस्त्यार येता. पावसाचे दडकेन नेमकें कितें जाता, तें स्मार्ट सिटींत दिसतलें. सगलें कितें वेवस्थीत केलां, आतां खंयच उदक तुंबचें ना, अशें व्हडले- व्हडले फुडारी सांगून गेल्यात. अंदूं पावसांत त्यो घोशणा खऱ्यो थारतात काय व्हांवून वतात, तें दिसतलेंच. कोयराची समस्या पयस करपाची व्हडली जापसालदारकी लोकांची. मात बरेच जाण, हातूंत सुशिक्षितूय आयले, मेळत थंय कोयर उडयतात. मागीर वारो, उदका वांगडा तातूंतलें प्लास्टीक, बाटल्यो गटारांनी पावतात. उदक वचपाची वाट आडयतात. प्लास्टीक नश्ट जावपाक देड- दोनशें वर्सां लागतात आनी ते ना जातलेंच हाची खात्रीय ना.
हो मिर्गा पयलींचो पावस. पावसाक जूनाच्या पयल्या सप्तकांत सुरवात जावं येता. तेन्ना पावसा संबंदीचीं कामां स्वराज्य संस्थांनी बेगीन जाग्यार घालचीं. जाणकार, पर्यावरण मोगीं कडल्यान सुचोवण्यो घेवच्यो आनी उदकाक मानान वचपाक वाट करून दिवची. नाजाल्यार तें आपले वांगडा कोणाक घेवन वचत तें सांगपाक येवचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
