भांगरभूंय | प्रतिनिधी
भांगरभूंय । प्रतिनिधी
पणजीः मिरामारच्या खवळल्ल्या दर्यांत नेटाच्या लाऱ्हांक लागून भरकटून वचून उपरांत बंद पडिल्ल्या नुस्तेंमारी ट्रॉलरांतल्या नुस्तेमारांक दृश्टीच्या लायफ गार्डानी सुरक्षीतपणान दर्या देगेर हाडले. रातयां 10 तें 1 मजगतीं दृश्टीच्या लायफ गार्डांनी नुस्तेमाऱ्यांक वाटावपाची ही मोहीम येसस्वी केली.
दर्यो शांत जाल्ल्यान बेतीच्यान 37 नुस्तेमारी ट्रॉलर घेवन पयर सांजे दर्यांत नुस्तेमारी करपा खातीर गेल्ले. थंय ट्रॉलराचें इंजीन अकस्मात बंद पडलें. तें सारकें करप शक्य ना अशें दिसतकूच ट्रॉलरा वयल्या नुस्तेमाऱ्यांनी मिरामार हांगा आशिल्ल्या दृश्टीचो कॅप्टन शैलेश आनी लायफ सेव्हर कमलेश हांचे कडेन मोबायला वयल्यान संपर्क सादलो. ताणे बीच सेफ्टी पॅट्रोलाचे (बीएसपी) मजतीत मजतकाम सुरू केलें.
राती 10 वरांचेर काळखांत जेट स्की घेवन उमेश आनी सागर दर्यांत गेलें बीएसपीन तांका सर्चलायट आनी हेर मजत केली. मध्यान रातीं 1 मेरेन तांणी ट्रॉलरा वयल्या दरेका नुस्तेमाऱ्यांक देगेर हाडलें. ट्रॉलर दर्यांत आसा आनी तो फावो त्या वेळार देगेर हाडपाचें काम करतले.
दृश्टीचे 400 लायफ गार्ड राज्यांतल्या दर्या देगांनी पर्यटकांचे हालचालीचेर नदर दवोरून आसतात. सध्या दर्यो खवळल्लो आशिल्ल्यान दर्या देगांनी तांबडे बावटे लावन ते पेंवपा खातीर सारके ना अशें दृश्टीन कळीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
