मिनी राष्ट्रीय टॅनीस बॉल क्रिकेट सर्ती खातीर गोंयचे पंगड

भांगरभूंय | प्रतिनिधी

भांगरभूंय । खेळां मेज
पणजीः शोलिंगपूर- तामिळनाडू हांका 17 तें 19 फेब्रुवारी मजगतीं जावपी 6वे मिनी राष्ट्रीय टॅनीस बॉल क्रिकेट सर्ती खातीर गोंयचे चले आनी चलयांचे गोंय आनी गोंय ए पंगड बुधवाराक रेल्वेन सर्तींत वांटो घेवपा खातीर गेले.
हे सर्तींत वांटो घेवपा खातीर गोंय टॅनीस बॉल क्रिकेट असोसिएशनाक खासा आमंत्रण दिल्लें. असोसिएशना वतीन मंगळारा एके खाशेले कार्यावळींत गोंयच्या दोनूय पंगडाक निरोप दिलो. ह्या असोसिएशनाची उपाध्यक्ष संध्या पालयेकार,  मेरशी पंचायतीचो पंच वांगडी दयेश वेंगुर्लेकार, असोसिएशनाचो पेडणेचो संयोजक किशोर किनळेकार,  काणकोणचो संयोजक किरण वैद्य,  मुरगांवचो संयोजक शामसुंदर वीर, हरिष पार्सेकार आनी हेमंत खोत हाजीर आशिल्ले.
कार्यावळींत खेळगड्यांक कीट दिलें. फाटल्या पांच मिनी राष्ट्रीय सर्तींत गोंयच्या चले आनी चलयांच्या पंगडाक वस्तादपण मेळयलां.