मालीम बेतींत बेकायदो बांदकामांचेर कारवाय

भांगरभूंय | प्रतिनिधी

कॅसिनोक सुवात दिवपाच्या उद्देशान कारवायः वेवसायिकांचो आरोप

भांगरभूंय । प्रतिनिधी

म्हापशें: मालीम जेटी लागसारचे बेकायदो गाडे आनी अनधिकृतपणान बांदिल्ली फुटपाथ मोडपाक पेन्ह द फ्रांक पंचायतीन सुरवात केल्या.

पर्यटन खात्यान नुस्तेमार जेटीच्या वाठारांतले गाडे काडून ती सुवात कॅसिनों खातीर दिवपाचो हालींच निर्णय घेतला. ते प्रमाण ही कारवाय चल्ल्या, असो आरोप थळाव्या वेवसायिकांनी केला.

शुक्रारा 11 नोव्हेंबराक सकाळीं पुलीस बंदोबस्तांत पंचायतीन ह्या बेकायदो बांदकामाचेर जेसीबी वतीन कारवाय सुरू केल्या. ह्या वेळार सरपंच स्वप्नील चोडणकार, उपसरपंच दीपाली वेर्णेंकार आनी पंच वांगडी हाजीर आशिल्ले.

हीं बादकामां येरादारीक आडखळ करतात, अश्यो कागाळी पंचायती कडेन आयिल्ल्यो. ते भायर अशीर रस्त्याचेर गाडयो पार्क केल्ल्यान येरादारेची कोंयडी जाताली. तशेंच खूब खेपे ग्रामसभेंत हो विशय थळाव्या लोकांनी मांडून गाडे काडपाची मागणी करताले, तशेंच ह्या विशयाचेर आमकां प्रस्न विचारताले. ते प्रमाण ही कारवाय सुरू केल्या, अशें सरपंच चोडणकार हांणी सांगलें.

पंचायती कडेन सुमार 25 गाड्यांक पंचायतीचो परवानो आसा. हे गाडे स्थलांतर करचे खातीर हॉकर्स झोन तयार करतले. थंय सगळे गाडे व्हरतले. जे बेकायदो आसात ते मातये भरवण करतले, अशीय म्हायती सरपंच चोडणकार हांणी दिली.

हे गाडे आनी रस्तो रुंदीकरण वाठारांत केल्ल्या अतिक्रमणा आड पंचायत संचालनालया कडेन सुनावणी सुरू आसा. हे गाडे काडपाचो देड वर्सां आदीं निर्णय जाल्लो. ते भायर ते गाडे रस्तो रुंदीकरण वाठारांत उबारल्यात. ताका लागून तांकां नोटीस जारी करपाचो प्रस्नूच येना, अशेंय सरपंच चोडणकार हांणी सांगलें.

‘गोंय कॅसिनोची राजधानी करपाची येवजण’

ही कारवाय म्हणल्यार फाटल्या दारांतल्यान कॅसिनोवाल्यांक मेकळें रान दिवप. सरकारान ह्या तशेंच गोंयांतल्या हेर जेटींचे कुशीची जमीन कॅसिनो खातीर दिवपाचो निर्णय घेतला. ते प्रमाण पंचायती वतीन पर्यटन खात्यान ही कारवाय सुरू केल्या. थळाव्या वा ल्हान वेवसायिकांचें कांयच पडिल्लें ना. फक्त अतिक्रमणाच्या नांवान सरकारी जमीन कॅसिनोवाल्यांक दिवपाचें हे कारस्थान आसा. गोंयांक कॅसिनोची राजधानी करपाची सरकाराची येवजण आसा, असो आरोप गाडेकारांनी केला.