भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें मार्केटांल्या दुकानांचें भाडें वाडोवपाचो निर्णय म्हापशें पालिका मंडळान घेतला. मात मार्केटांत सीसीटीव्ही कॅमेरे, गटारां आनी रस्ते ह्या सारक्यो मुळाव्यो सुविधा मेळोवन दिवच्यो आनी उपरांत भाडें वाड करची अशी मागणी म्हापशें कॉग्रेस गट समितीचो अध्यक्ष आनी नगरसेवक अॅड शशांक नार्वेकार हाणे केल्या. ह्या निर्णयाची म्हायती दिवपा खातीर मार्केटाच्या दारांत घेतिल्ले पत्रकार परिशदेक काँग्रेसचे सरचिटणीस विजय भिके, नगरसेवक सुधीर कांदोळकार, चंदन मांद्रेकार, मिताली गडेकार आनी समितीचे हेर पदाधिकारी हाजीर आशिल्ले.
मार्केंटांतल्या गटारांची नितळसाण आनी कोयर उखलून व्हरप ह्या सारकी वेवस्था वेपारी आनी गिरायकां खातीर ना. फक बुन्यादी फातोर बसोवपाचे इव्हेंट पालिका मंडळ करता. नांवांचो पोरणो तकटो काडून नवो तकटो बसयतात अशी टिका नार्वेकार हाणे केली. म्हापशे शारांत शौचालयांचो उणाव आसा. थळाव्या आमदारान मलनिस्सारण प्रकल्प चालीक लावपा खातीर यत्न करपाक जाय. बाजारांतल्या उदकाची पातळी चड आशिल्ल्यान घाणयाऱ्या उदकाची जिरवण जायना. मार्केटांतले घाणयारे उदक गटारांत सोडटात. पार्किगाचो विशय तसोच पडून आसा अशें सुधीर कांदोळकारान सांगलें.
पालिके खातीर महसूल गरजेचो आसा पूण ताच्या बदल्यांत पालिका मंडळान वेपाऱ्यांक मुळाव्यो सुविधा मेळोवन दिवप तितलेंच म्हत्वाचें आसा. पालिका मंडळान फाटले साबार बसकेंत भाडेंवाड करपाचो निर्णय घेतिल्लो. पूण तो अर्थीक विशय आशिल्ल्यान तो बसकेच्या अजेंड्यांत हाडपाची गरज आशिल्ली. मात नगराध्यक्षान घाई करून तो मंजूर करून घेतलो असो आरोप शशांक नार्वेकारान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
