भांगरभूंय | प्रतिनिधी
भांगरभूंय प्रतिनिधी
मडगांव ः तियात्र अकादमीचे उपाध्यक्ष आनी लेखक मारियो मिनेझिस हांकां कोंकणी भाशा मंडळान आर्गां ओंपल्यांत. 25 जून 2022 दिसा ते ह्या संवसाराक अंतरले. तांचो जल्म 29 मे 1960 दिसा जालो. तांणी पिरायेच्या 6 वर्सांचेर तियात्रांत काम करपाक सुरवात केली. आयज मेरेन हजारांनी तियात्रांनी तांणी काम केलां. गोंय, मुंबय, पुणे, गुजरात, मंगळूर, लंडन, अबुधाबी, कतार, बाहरीन, मस्कत, कुवेत अश्या साबार कडेन तांणी तियात्रां सादर केल्यांत. आयज मेरेन तांणी 50 वयर तियात्रां बरयल्यांत आनी 18 वर्सां भितर 50 तियात्र बरोवन दिग्दर्शीत करपाचो तांचो विक्रम आसा.
तांणी 2 व्हिडियो फिल्मां बरोवन दिग्दर्शीत केल्यांत. तशेंच तांणी साबार तियात्रांचीं पुस्तकां बरोवन प्रकाशीत केल्यांत. ‘उपरांत रडून कित्याक उपकारता’, ‘बैमान कीर’ आनी ‘शिरलो’ हांचो तातूंत आसपाव आसा. तांणी आयज मेरेन सुमार 25 व्हिडियो फिल्मांनी काम केलां आनी 87 वयर कॅसेटींनी आनी सीडींनी आपलो आवाज दिला.
तांकां कला अकादेमीचे तियात्र सर्तींत अभिनय तशेंच दिग्दर्शनाचीं साबार इनामां फावो जाल्यांत. तशेंच तांकां गुलाब पुरस्कार, डॉ. जॅक सिक्वेरा पुरस्कार आनी तियात्र अकादेमीचो पुरस्कार फावो जाला. तशेंच तांकां मुंबय आनी विशाखापट्टणमांत जाल्ल्या अखील भारतीय मेजर पोर्ट सांस्कृतीक मेळांत उत्कृश्ट अभिनयाचो पुरस्कार मेळ्ळा.
तांकां गोवा कोंकणी अकादेमीचो उत्कृश्ट संहितेचो पुरस्कार मेळ्ळा. दाल्गाद कोंकणी अकादमीन जीवन गौरव पुरस्कार दिवन तांकां सन्मानीत केल्यात. ते भायर कुवेट- गोंय तियात्रिस्तांची संस्था, कोंकणी उलोवप्यांचो आसरो, नागपूर ह्या संस्थांनीय तांचो भोवमान केला. तांकां कोंकणी भाशा मंडळाचो साहित्य पुरस्कार फावो जाला.
मारियोबाब हांच्या मरणान एका बऱ्या लेखकाक आनी कलाकाराक आमी मुकल्यात. निमण्या खिणा मेरेन ते कलेची सेवा करत आशिल्ले. तांच्या कामांतल्यान ते सदांकाळ आमचे मदीं उरतले अशें कोंकणी भाशा मंडळाचे वतीन उजवाडायिल्ल्या पत्रकांत अध्यक्ष अन्वेषा सिंगबाळ हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
