भांगरभूंय | प्रतिनिधी
भांगरभूंय । प्रतिनिधी
केपेंः राष्ट्रीय शिक्षक पुरस्कार फावो जाल्ल्या मोरपिर्ला हायस्कुलाची मुख्याध्यापिका मारिया मोरिना मिरांडा हाची केपेंचो आमदार एल्टन डिकॉस्ता हांणी भेट घेवन तिका परबीं भेययलीं. ह्या वेळार तांच्या वांगडा मोरपिर्ला पंचायत सरपंच आश्विनी गांवकार, उपसरपंच प्रकाश वेळीप, पंच वांगडी नागेश वेळीप आनी नितेश गांवकार आशिल्ले.
मोरपिर्ला हायस्कुलाच्यो ज्यो समस्या आसात तो सुटाव्यो करपाक प्राधान्य दिवपाचें उतर आमदार डिकॉस्ता हांणी मिरांडा हांका दिलें. केपें मतदारसंघात अनुसूचित जमातींतल्या लोकांचो आंकडो सगल्यांत चड आसा. ह्या समाजातले भुरग्यांनी पदव्युत्तर शिक्षण घेवन लेगीत ते अजून बेकार आसात. ताकां रोजगार मेळोवन दिवपाचो आपलो यत्न आसतलो. शिवाय केपें मतदारसंघांतल्या दरेका विद्यालयातल्या विद्यार्थ्यांक खेळपा खातीर मैदान उपलब्द करून दिवपा खातीर आपूण खेळां खात्या कडेन उलोवणी करतलों अशें डिकॉस्ता हांणी पत्रकारां कडेन उलयतना सांगलें.
आमदार म्हणून वेंचून आयल्यार म्हाका पांच म्हयने जाल्यार, लोकांचे बरेच प्रश्न सुटावे करपाक म्हाका येश मेळ्ळां. पांच वर्सांच्या कार्यकाळांत चडात चड काम करून लोकांक भेस्टायतात त्यो समस्या पयस करपाक आपूण वावुरतलों अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
