भांगरभूंय | प्रतिनिधी
पणजीः हडफडें, पर्रा, कांदोळी आनी कळंगूट ओडीपी विशीं तशेंच कला अकादमीचें नुतनीकरण बांदकामांत भ्रश्टाचार जाल्ल्याचे पुरावे नाशिल्ल्यान भ्रश्टाचार विरोधी पंगडांत दाखल केल्ल्यो कागाळी निकालांत काडल्यात.
ह्या प्रकरणांत अखील गोंय खाजगी बस धनी संघटणेचे फुडारी तशेंच समाज वावुरपी सुदीप ताम्हणकार हांणी कागाळ दाखल केल्ली. कागाळे प्रमाण, कला अकादमी बांदकाम संबंदांतली निविदी प्रक्रिया जावंक ना. कसलेंय काम सुरू करचे आदीं निविदा प्रक्रिया पुराय करची, असो सरकारी कायदो आसा. अशें आसून लेगीत सरकारी नेम मोडून कला अकादमीच्या नुतनीकरणाचें बांदकाम हातांत घेतलां. ताका लागून तातूंत भ्रश्टाचार जाल्ल्याचो दावो सुदीप ताम्हणकार हांणी केला. तशेंच ह्य प्रकरणांत ताम्हणकार हांणी कला आनी संस्कृती मंत्री गोविंद गावडे हांचे आड गुन्यांव दाखल करचे खातीर भ्रश्टाचार विरोधी पंगडांत कागाळ दाखल केल्ली.
हे कागाळेची मुळावी चवकशी केली तेन्ना तातूंत भ्रश्टाचार जाल्ल्याचे पुरावे नाशिल्ल्यान पुलीस निरिक्षक मेलिटो फर्नांडीस हांणी ती निकालांत काडली.
मजगतीं, हडफडें, नागवें, पर्रा, कांदोळी आनी कळंगूटेची जमीन बांदकामा खातीर तशेंच वेवसायीक वापरा खातीर रुपांतरीत केल्या. पीडीए तशेंच जमनीच्या रुपांतरणांत खूबशे गैरप्रकार जाल्यात. ह्या प्रकरणांत कळंगूटचे आमदार मायकल लोबो हांणी आपल्या अधिकाराचो गैरवापर करून संबंदीत जमनींचें रुपांतरण केला, असो आरोप सुदीप ताम्हणकार हांणी केल्लो. ह्या संबंदांत ताम्हणकार हांणी लोबो हांचे आड भ्रश्टाचार विरोधी पंगडांत 8 ऑगस्टाक कागाळ दाखल केल्ली. हे कागाळेची दखल घेवन एसीबीचे निरिक्षक रितेश तारी हांणी मुळावी चवकशी केली तेन्ना तातूंत भ्रश्टाचार प्रतिबंधक कायद्या संबंदांत कसलेच पुरावे नाशिल्ल्याचें निरिक्षण नोंद करून लोबो विरोधांत दाखल केल्ली कागाळ निकालांत काडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
