मानीस संसाधन उदरगत म्हामंडळावतीन 23वो कारगील दिस मनयलो

भांगरभूंय | प्रतिनिधी

भांगरभूंय । प्रतिनिधी
पर्वरीः 1999 वर्सा कागगील झुजांत भारतीय जवानांनी दिल्ल्या बलिदानाचो भोवमान करपा खातीर गोंय मनीस संसाधन म्हामंडळावतीन (जीएचआरडीसी) 23वो कारगील विजय दीस मनयलो. कारगील ऑपरेशनांत सक्रियपणान वांटेकार जाल्ले नौदल अधिकारी कॅप्टन उत्पल दत्ता ह्या वेळार मुखेलय सोयरे म्हणून हाजीर आशिल्ले. झूज आनी केल्ले कारवायेचें तांणी सादरीकरण केले. त्या वेळार नौदलांत पायलट आशिल्ले कॅप्टन दत्ता सधअया नौदल एव्हिएशन, गोंय हांका कामाक आसात.
नौसेना पदक फावो जाल्ल्या दत्ता हांणी द्रास वाठारांत सैन्याक उदक, रसद पुरोवपाचें काम केल्लें तांणी आपलें विमान 26,400 फुटांचेर व्हरून बोफोर्स तोफांक मार्गदर्शन केल्लें तशेंच तांच्या पंगडान14,700 परस चड फुडांचेर जखमी जाल्ल्या जवानांक सुरक्षीत सुवातेर हाडपाचें काम केल्लें. द्रास आनी कारगील एलओसीच्या वटेन 130 किलोमीटर परस चड वाठारांत हेलिकॉप्टर ही एकूच जीवनवाहिनी आशिल्ली. फकत चार वरां न्हिदून आमी देशसेवा करताले अशें कॅप्टन दत्ता हांणी सांगलें.
1 गोबा बटालियन एनसीसीचो कमांडीक ऑफिसर कर्नल मनोज राठोड कार्यावळीक हाजीर आशिल्लो. सुरवेक जीएचआरडीसीचो म्हावेवस्थापक (सुरक्षा) जॉन आगियार हांणी सोयऱ्यांची वळख करून दिली. वरिश्ठ सुरक्षा अधिकारी सिद्देश बोर्डेकार हांणी येवकार दिवन सूत्रसंचालन केलें. वेवस्थापकीय संचालक नारायण नावती हांणी उपकार मानले. ताचे पयली सुरक्षा रक्षक नवनाथ उसपकार हांणी देशभक्ती गीतां सादर केलीं. मुख्य लेखाधिकारी फिलोमिनो परेर ह्या वेळार हाजीर आशिल्ले.