भांगरभूंय | प्रतिनिधी
पुलीस म्हासंचालकः पणजे जनजागृती रॅली
भांगरभूंय । प्रतिनिधी
पणजीः मानवी तस्करी हो व्हड गुन्यांव. लोक पयशांचे आशेन अशे गुन्यांव करतात. लोक हाका बळी पडटात. पुलीस खातें हे विशीं जागृत आसा, अशें गुन्यांव आडायता. हे विसीं अर्ज संस्था जनजागृती करून बरो वावर करता. पुलीस खातेंय अशें गुन्यांव गोंयांत घडचे न्हय म्हूण वावर करता, अशें हे कार्यावळींत मार्गदर्सन करतना पुलीस म्हासंचालक जसपाल सिंग हांणी सांगलें.
संवसारीक मानवी तस्करी विरोधी दिसा निमतान बिगर सरकारी संस्था अर्ज तशेंच गोंय पुलीस खात्या वतीन पणजे जनजागृती रॅली काडली. ह्या वेळार पुलीस म्हासंचालक जसपाल सिंग तशेंच हेर पुलीस अधिकारी, अर्ज संस्थेचे कार्यकर्ते हाजीर आशिल्ले.
गोंय हें संवसारीक पर्यटन थळ आसा. गोंयांत लाकांनी पर्यटक येतात. खूबश्या गरीब लोकांक गोंयांत पयशांचें हांयस दाखोवन हाडटात. लोकांची तस्करी करतात. वायट वेवसायांत घुस्पायतात. गोंयांत फाटल्या कांय वर्सांनी अशें गुन्यांव वाडल्यात. गोंयांतल्या सगळ्या पुलीस स्टेसनांचेर सल्लागार समिती स्थापन करून अशे गुन्यांव घडचे न्हय हे खातीर हाची दखल घेवची, अशें अर्ज संस्थेच्या पदाधिकाऱ्यांनी सांगलें. पणजे आझाद मैदानाचेर ही कार्यावळ जाली. ह्या वेळार म्हाविद्यालयांतल्या विद्यार्थ्यांनी रस्तो नाट्य सादर केलें. तशेंच आझाद मैदान ते कला अकादमी मेरेन रॅली काडली. तातूंत शेंकड्यांनी विद्यार्ती तशेंच महिलांनी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
