‘माती वाचयात’ विशीं जागृती करपाक पुणेचे दुचाकी चालक गोंयांत

एच. आस. चिदानंद प्रभी, राहुल कुलकर्णी, दुचाकी चालकां सयत डॉन बॉस्को कॉलेज ऑफ एग्रीकल्चरचे विद्यार्थी.

भांगरभूंय | प्रतिनिधी

वास्कोः ‘संवसारीक माती वाचयात’ मोहिमेचो एक वांटो म्हूण पुण्यांतल्या कांय दुचाकी चालकांनी सांखळी, मडगांव, सूर्ल, फोंडें, वेर्णें, वास्को, पणजी वाठारांत ‘माती वाचयात’ संबंदांत जागृती कार्यावळ केली.

देशभरांतले हजारांनी दुचाकी चालक दोन सप्तकाचे मोहिमेंतल्यान माती वाचयात हो संदेश दिवचे खातीर प्रवास करतात. ताचोच एक वांटो म्हूण पुण्याच्या कांय दुचाकी चालकांनी महाराष्ट्र, कर्नाटक आनी गोंय राज्यांतल्या कांय शारांक भेट दिली.

ह्या दुचाकी चालकांनी सूर्लाच्या सिद्धेश्वर मंदिरांत आयोजीत केल्ले कार्यावळींत ईशा फावंडेशनाचे संस्थापक सद्गुरू हांणी दिल्ले संदेश आनी संवासारांतले मातयेचो धूप हे संबंदांतलो व्हिडीयो दाखयलो. भारतीय कृशी संशोधन परिशदेचे विशय तज्ञ आनी वरिश्ठ शास्त्रज्ञ एच. आर. चिदानंद प्रभू हांणी सुमार 50 शेतकारांक म्हायती दिली. जमनीचो कस वाडोवचे खातीर सेंद्रीय घटक परतून घालपाचे गरजे विशीं मार्गदर्शन केलें.

पृथ्वी वयले जीवसृश्टीची राखण करचे खातीर माती हो सामको  गरजेचो घटक आशिल्ल्याचें सहाय्यक मुख्य तंत्रीक अधिकारी (कृशीशास्त्र) राहूल कुलकर्णी हांणी सांगलें. ते खातीर शेतकार कस म्हत्वाचो आसा, ते विशीं म्हायती दिली.

हे कार्यावळीक डॉन बॉस्को कॉलेज ऑफ एग्रीकल्चर सुळकोण केपेंचे कांय विद्यार्थी हाजीर राविल्ले. हे विद्यार्थी ग्रामीण शेतीचो अणभव घेवपाचे कार्यावळीचो एक वांटो म्हूण शेतकारां वांगडा काम करतात.

जेसीआय सांखळीचे अध्यक्ष चेतन सालेलकार हांणी पांच हजार झाडांचे रोंपे लावचे खातीर आमंत्रीत केल्ले. हे कार्यावळीक सचीव निकिता देसाय, कार्यावळ उपाध्यक्ष तेजस केणी, भांडारी संदीप पार्सेकार हाजीर आशिल्ले.