भांगरभूंय | प्रतिनिधी
पेडणें: मांद्रें देऊळवाड्या वयल्या केशव मंगेश मांजरेकार हाच्या घरांत दोनूच मनशां रावतात. तांकां दर म्हयन्याक 750 ते 800 रुपया विजेचें बील येतालें. पूण ह्या म्हयन्यांत मात ताका 57 लाक 36 हजार 285 रुपया बील आयलां.
मजगतीं, सांजे उसरां मेळिल्ले म्हायती प्रमाण वीज बिलांत दुरुस्ती 538 रुपयांचें बील वीज विभागान मांजरेंकार हांकां दिलां. ताका लागून तांणी समाधान उक्तायलां.
विजेचें बील येवपाकूय मर्यादा आसा. विजेंचें बील दिवपाचें कंत्राट दिल्ली एजन्सीचे कामगार दोळे धांपून बिलां काडटात काय कितें, असो प्रस्न सध्या मांद्रें पंचायत वाठारांत चर्चेंत आसा.
ह्या प्रतिनिधीन केशव मांजरेकाराची ह्या संबंदांत दनपारां भेट घेतली. त्या वेळार तांणी सांगलें, आदीं आपल्याक 750 ते 800 रुपया विजेचें बील येतालें. पूण ह्या म्हयन्यांत मात 57 लाख 36 हजार 285 रुपयांचें बील आपल्या हातांत पडलें तेन्ना आपल्याक धपकोच बसलो. आपणें रोखडींच आगरवाड्या वयल्या उपविभागीय वीज केंद्रांतल्या अधिकाऱ्यां कडेन चर्चा केली. फुडल्या म्हयन्यांत विजेचें बील दुरुस्त करून परतून दितले, अशें तांणी सांगलां. पूण मूळ बिलाची फोटो कॉपी त्या अधिकाऱ्यान काडून दवरूंक ना. ताका लागून विजेच्या बिलाची कशे तरेन दुरुस्ती करतली, असो प्रस्न आपल्याक पडला, अशें मांजरेकार हांणी सांगलें. सध्या आयिल्ल्या 57 लाख 36 हजार 285 रुपयांच्या वीज बिलाची दुरुस्ती केन्ना करतले? नियमीत बील जर स म्हयन्यां उपरांत आयलें जाल्यार इतली व्हड रक्कम भरप आपल्याक शक्य जावचें ना. आपणें हें बील सोशल मिडियाच्या माध्यमांतल्यान मुख्यमंत्र्यांच्या ओएसडी मेरेन पावयलां आनी ताची दखल घेवची अशी मागणी केल्या, अशें मांजरेंकार हांणी सांगलें.
तंत्रीक चुकीक लागून चुकीचें बीलः स्टीफन फर्नांडीस
मांद्रेंच्या केशव मांद्रेंकार हांच्या घराक तंत्रीक चुकीक लागून 57.36 लाखांचें बील आयलें. ताका अचूक रकमेचें सुदारीत बील दिलां. बिलाचो आंकडो कसो चुकलो, ताची खात्या वतीन चवकशी सुरू आसा. मिटर रिडींग करून तशेंच युनिटाचो दर कंप्युटराचेर टायप करून बील तयार जाता. तंत्रीक चुकी खातीर हो प्रकार घडलो. तांणी बील फारीक करूंक नाशिल्लें. कांय खेपे बिलाचे रकमेंत चुकी जावप शक्य आसता. कोणाकूय दुबाव आयलो जाल्यार तांणी खात्या कडेन कागाळ करूं येता. एकाद्या वेळार बिलाचे चड पयशे भरले जाल्यार लेगीत फुडल्या बिलांतल्यान आलायती रक्कम वजा करपाची सुविधा आसा, अशें मुखेल वीज अभियंते स्टीफन फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
