मांद्रें मतदारसंघांतले रस्ते परतून खणटले ?

भांगरभूंय | प्रतिनिधी

तुयां उदका प्रकल्पाचो वावर सुरू; तुयें आयटीआय ते चोपडें रस्तो खणून घालतले पायपलायन

भांगरभूंय । प्रतिनिधी

पेडणें: मांद्रें मतदारसंघांतले रस्ते भुंयगत वीज केबल घालचे खातीर खणिल्ले. ताका लागून रस्ते धोकादायक जाल्ले आसतनाच आतां परतून एकदां तुयें ते चोपडें मेरेन 8 किलोमिटर लांबायेचो रस्तो परतून एकदां उदकाची पायपलायन घालपा खातीर खणपाचे आसात.

मांद्रें मतदारसंघांतल्यो लोकांच्या मुळाव्या सुविधां कडेन लक्ष दिवचे खातीर आमदार जीत आरोलकार सरकार दरबारांत यत्न करता. जाल्यार दुसरे वटेन सर्वसामान्य वाहनचालकांक मांद्रें मतदारसंघांतले रस्ते वाहनां चलोवपा खातीर धोकादायक थारतात. सगळे वटेन धुल्ल वयल्यान भुंयगत वीज केबल घालपा खातीर खणिल्ल्या रस्त्यांचेर अजून मेरेन डांबर घालूंक नाशिल्ल्यान पावसाळ्यांत हे रस्ते आनिकूय धोकादायक जावपाची शक्यताय आसा.

मांद्रें मतदारसंघांतली उदकाची समस्या सुटावी करचे खातीर आमदार जीत आरोलकार हांणी सरकार दरबारांत यत्न करून तुयें आयटीआय वाठारांत 8 हजार चौखण मिटर सुवातेंत 30 एमएलडी लिटर उदक प्रकल्प उबारपाची मुळावी सुरवात केल्या. ते सुवातेंच उदका प्रकल्प उबारून तुयें उद्देगीक वसणुके वांगडाच तुयें हॉस्पिटल आनी मांद्रें मतदारसंघांतल्या लोकांक उदका पुरवण करचे खातीर हो प्रकल्प म्हत्वाचो थारतलो. ह्या प्रकल्पाक लागून उदकाचे समस्येचेर योग्य उपाय सांपडटलो, असो विस्वास दर खेपे आमदार आरोलकार हांणी उक्तायला.

चार दिसां आदीं भौशीक बांदकाम मंत्री निलेश काब्राल हांणी थळावे आमदार जीत आरोलकार आनी प्रवीण आर्लेकार हांचे वांगडा आयटीआय वाठारांत नवो उदका प्रकल्प उबारपा खातीर सुवातेची पळोवणी केली. कंत्राटदार, अभियंत्यांक योग्य त्यो सुचोवण्यो दिवन बेगिनात बेगीन हो प्रकल्प सुरू करपाचे आदेश दिल्यात.

आयटीआय ते चोपडें मेरेन आठ किलोमिटर लांबायेच्या रस्तो खणून पावसाळ्यां आदीं तातूंत पायपलायन घालात, अशी सुचोवणी मंत्री काब्राल हांणी कंत्राटदाराक केल्या.

आदींच वीज खात्यान भुंयगत वीज केबल घालचे खातीर रस्तो एके वटेन अर्द्या परस अदीक खणिल्लो. आतां उरिल्लो रस्तो उदकाची पायपलायन घालचे खातीर खणपाक सुरवात जातली. ताका लागून तुयें आयटीआय ते चोपडें जंक्शना मेरेनचो पुराय रस्त्याचेर पावसाळ्यां आदीं डांबर घातलें ना जाल्यार पुराय रस्तो उदका पोंदा वतलो. ताका लागून पावला पावलार पडिल्ल्या फोंडकुलांक लागून वाहनां चलोवप धोकादायक थारूं येता, अशी भिरांत स्वता आमदार आरोलकार हांणी मंत्र्यां मुखार उलोवन दाखयल्ली. त्या वेळार मंत्र्यान आपूण कंत्राटदारांक वेवस्थीत सुचोवणी दितलों, अशें सांगिल्लें. भुंयगत वीज केबल घालला त्या रस्त्याचें डांबरीकरण करतले आनी उपरांतूच दुसरे वटेन उदकाची पायपलायन घालचे खातीर रस्तो खणटले, अशें तांणी सांगलें.

दोन वर्सां भितर उदकाचे समस्येचो अंतः आरोलकार

जुनसवाडो मांद्र्यां नवें स्वतंत्र उपविभागीय वीज केंद्र सुरू करपाचें काम झुजां पावड्यार चल्लां. ताचे खातीर भुंयगत वीज केबल घालपाक रस्ते खणल्यात. त्या रस्त्यांची दुरुस्ती रोखडीच करतले. ते भायर आतां तुयां स्वतंत्र 30 एमएलडी उदक प्रकल्प उबारपाची प्रक्रिया सुरू जाल्या. ते खातीर लेगीत रस्ते खणचे पडटले. लोकांनी इल्लें पाशियेंस काडचें. समस्येचेर उपाय काडटना कांय प्रमाणांत आडखळी येतातूच. लोकांनी ह्या वावराक आदार करचो. हो प्रकल्प जाले उपरांत देड ते दोन वर्सां भितर मांद्रें मतदारसंघांतली उदकाची समस्या सुटावी जातली, असो विस्वास आमदार जीत आरोलकार हांणी उक्तायला.

लोकांक विस्वासांत घेवनूच उदरगत जावचीः पार्सेकार

कोणाचीच कसलीच पर्वा करिनासतना सगळेच कडेन नियोजनशून्य सरकाराची कामां चालू आसात. खरें म्हणल्यार खंयचेय उदरगतींत लोक हे म्हत्वाचें आसपाक जाय. लोकां मुखार संकश्ट निर्माण करून जावपी कामांक उदरगत कशें म्हणपाक जातलें? लोकांक विस्वासांत घेवनूच उदरगत जावपाक जाय, अशें मत समाज वावुरपी जगन्नाथ पार्सेकार हांणी उक्तायलें.