मांद्रें पंचायतीचो संगीत खेळ चालूच; उपसरपंचा आड अविस्वास थाराव

भांगरभूंय | प्रतिनिधी

निवड जावन 24 वरां भितर सरपंचाचेर हाडिल्लो अविस्वास थाराव

पेडणें: मांद्रेंच्यो उपसरपंच चेतना पेडणेंकार हांचे आड वट्ट सात पंच वांगड्यांनी अविस्वास थाराव हाडिल्ल्यान मांद्रें पंचायतीचो संगीत कदेलाचो खेळ सोंपून सोंपना अशी स्थिती निर्माण जाल्या.

एका म्हयन्या भितरूच सरपंच आनी उपसरपंच हांकां आपलीं कदेलां सोडपाचो प्रसंग आयला. आदले सरपंच महेश कोनाडकार हांकां सरपंचपदार निवड जावन फक्त 24 वरां भितरूच अविस्वास थारावाक सामकार वच्चें पडिल्लें. जाल्यार सुमार 20 दिसा उपरांत उपसरपंच चेतना पेडणेंकार हांकां अविस्वास थारावाक सामकार वच्चें पडलां.

उपसरपंच चेतना पेडणेंकार हांचे आड तारा हडफडकार, प्रशांत नायक, मिथेन फर्नांडीस, रॉबर्ट फर्नांडीस, मिंगेल फर्नांडीस, किरण सावंत, अमीत सावंत हांणी अविश्वास थारावाचे वटेन सयो केल्यात.

वट्ट 11 पंच वांगडी आशिल्ल्या पंचायत मंडळाचेर सुरवातेक आदले आमदार दयानंद सोपटे हांणी आपलो गट तयार करून महेश कोनाडकार हांची बिनविरोध सरपंच म्हूण जाल्यार उपसरपंच म्हूण चेतना पेडणेंकार हांची निवड केल्ली. उपरांत रोखडोच 24 वरां भितर सरपंच महेश कोनाडकार हांचे आड सात पंच वांगड्यांनी अविस्वास थाराव दाखल करून पंचायत क्षेत्राच्या इतिहासांत एक नवो इतिहास रचलो, आनी 24 वरां भितर अविस्वास थाराव दाखल करपी पयली पंचायत मांद्रें थारली.

अविस्वास थाराव मंजूर जाले उपरांत अमीत सावंत हांची सरपंचपदार बिनविरोध निवड जाले उपरांत, आतां उपसरपंच चेतना पेडणेंकार हांचे आड अविस्वास थारावाची नोटीस दिवन तांची सुवात आदली सरपंच तशेंच विद्यमान पंच तारा हडफडकार हांकां उपसरपंचपदार बसोवपा खातीर हो प्रकार घडोवन हाडला अशें खाशेल्या गोपां कडल्यान कळटा.

आदले सरपंच महेश कोनाडकार हांचे आड अविस्वास थाराव हाडले उपरांत वट्ट सात पंच वांगड्यांनी थळावे आमदार जीत आरोलकार हांचे सयत थेट रेडी हांगासरल्या स्वयंभू श्री गणपती देवळांत वचून वचन घेतिल्लें. कबलात करीत आसतना सरपंच म्हूण अमीत सावंत जाल्यार उपसरपंच म्हूण तारा हडफडकार आनी उरिल्ल्या काळा खातीर हेरांक सरपंच आनी उपसरपंच करपाचो अलिखीत कबलात ह्या देवा मुखार केल्या.

अविस्वास थारावाची नोटीस पेडणें गट विकास अधिकारी केदार हांचे कडेन काल (मंगळारा) सादर केली.