भांगरभूंय | प्रतिनिधी
येरादारी पुलीस नेमपाची मागणी
हरमल: सद्या पर्यटन हंगाम सुरू जाला. शेंकड्यांनी पर्यटकांची वाहनां गोंयांत येत आसात. तातूंत पर्यटकांक उत्तर गोंयचे आकर्शण चड. हेच फाटभुंयेर मदलोमाज आनी आश्वें जंक्शनाचेर येरादारीची कोंयडी तकलीफोड जावंक लागल्या.
ह्या वाठारांतल्यान हरमल, केरी तेरेखोल तशेंच महाराष्ट्रांत पर्यटन आनी हेर कामा खातीर वचपी पर्यटकांक मदलोमाज रस्त्या वेल्यान वचचें पडटा. पूण बाजार करपा खातीर आनी हेर कामा खातीर वचपी गिरायकांच्यो दुचाकी आनी चारचाकी गाडयांक लागून तशेंच अस्ताव्यस्त पार्किंगेक लागून येरादारीची कोंयडी ही सदचीच जाल्या. ताका लागून कर्णकर्कश हॉर्न आनी धुंवराच्या प्रदुशणाक लागून वाठारांत धुल्ल जायत आशिल्ल्याचें वेवसायीक प्रेमानंद मांद्रेंकार हाींण निरशेणी उक्तायली.
मजगतीं, ह्या वाठारांतल्या रस्त्यांची दुरावस्था पळोवन वाहचालक वाहनां फोंडकुलांतल्यान व्हरनात. तशेंच मोटार उमथुपाची शक्यताय आशिल्ल्यान वाहनांक सायड लेगीत दिनात. तशेंच सकाळच्या वेळार नुस्तें विकपी बायलां रस्त्याचे कुशीक बसून नुस्त्याची विक्री करीत आशिल्ल्यान येरादारीक आडमेळीं निमाण जायत आसता. हे विशीं पंचायतीन नुस्तें विकपी बायलांक मार्केट संकुलांत बसपा खातीर भाग पाडचें अशी मागणी कांय वेवसायिकांनी नांव न घेवपाचे अटीचेर केल्या.
बेशिस्त पार्किंगेचेर कारवाय करची
मदलोमाज बाजारांतल्या ह्या अरुंद रस्त्यार वाहनां पार्कींग करप पुरायपणान बंद करप गरजेचें आसा. ते खातीर येरादारी विभागान पंचायतीच्या आदारान आराखडो निश्चीत करून कार्यवाही करपाची मागणी मांद्रेंकार हांणी केल्या. ह्या बाजारांत विवीध आस्थापनां आसून बेशिस्त पार्किंगेचो फटको, वाहनचालकांक आनी पर्यटकांक जायत आशिल्ल्यान दंडात्मक कारवायेचे अधिकार होमगार्ड आनी येरादारी नियंत्रकांक दिवचें अशी मागणी जायत आसा.
येरादारी विभागान कारवाय करची
येरादारी विभाग फक्त हॅल्मेट, लायसन्स आनी धव्या हळडुव्या नंबरप्लेट आशिल्ल्या दुचाकीचेर कारवाय करचे परस दरेक सुवातेर जावपी कोंयडेची समस्या सोडोवपा खातीर पावलां उबारची. ते खातीर येरादारी विभागान येरादारी नियंत्रक नेमून, येरादारीचे कोंयडेचेर उपाय येवजण केल्यार आवाज आनी धुंवराचे प्रदुशण शुन्य जातलें अशी मागणी वेवसायीक करीत आसात.
मांद्रें मतदारसंघाचे आमदार जीत आरोलकार हांणी ह्या प्रस्नाचेर लक्ष घालून पर्यटन हंगामांत दर्यादेग वाठारांतले विवीध रस्ते आनी नाक्यार येरादारी नियंत्रकाची नेमणूक करपाची मागणी जायत आसा. तरी येरादारी विभागाच्या कार्यक्षम अधिकार्यांनी मदलोमाज आनी हेर दर्यादेग वाठारांतले येरादारी वेवस्थे कडेन लक्ष दिवन येरादारीची कोंयडी जावची ना हाची दक्षताय घेवची अशी मागणी जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
