भांगरभूंय | प्रतिनिधी
मुख्यमंत्र्या हस्तुकीं ‘मांडवी’ ह्या शिक्षणीक फ्लॅगशिप कार्यावळीचोे शुभारंभ
पणजी: मुख्यमंत्री डॉ. प्रमोद सावंत हांणी आयज उच्च शिक्षण संचालनालयान सुरू केल्ल्या ‘मांडवी-MANDAVI ’ (मेंटोरींग अॅण्ड नर्चरिंग डिजिटल अॅण्ड व्हर्च्युअल इनिशिएटिव्हज) हे फ्लॅगशीप कार्यावळीचोे शुभारंभ केलो.
ह्या वेळार उलयतना मुख्यमंत्री डॉ. सावंत हांणी म्हणलें, आयज आमी शिक्षणीक मळार नवो मांडवी सेतू बांदतात. ज्या विद्यार्थ्यांक अभ्यासक्रम पुराय करप शक्य जायना अशा विद्यार्थ्यांक मांडवी चॅनल उपक्रमावरवीं ऑनलायन पद्धतीन शिक्षण घेवपाची आनी अभ्यासक्रम पुराय करपाची संद उपलब्ध करून दितले.
गोंयांत नव्या शिक्षणीक धोरणाची अंमलबजावणी करपा खातीर IAIMS, DISHTAVO आनी MOOC सारखे उपयुक्त डिजिटल उपक्रम सुरू केल्लेखातीर मुख्यमंत्र्यान उच्च शिक्षण संचालनालयाच्या प्रयत्नांचीय तोखणाय केली.
‘मांडवी’ हो उच्च शिक्षण संचालनालयाचो उपक्रम MOOC विकसीत करपाचो उपक्रम आसा. जे वरवीं संवसारभरांतल्या हजारांनी विद्यार्थ्यांक उच्च दर्जाचे अभ्यासक्रम उपलब्ध करून दितात. MOOC ही एक शिक्षणाची पद्धत आशिल्ल्यान विद्यार्थी डिजिटल माध्यमावरवीं उच्च शिक्षण अभ्यासक्रम पुराय करपाक शकता.
उच्च शिक्षण संचालनालयाच्या सध्या विकसीत जावपी MOOC अभ्यासक्रम विद्यापीठ अनुदान आयोगाच्या अभ्यासक्रमाचेर आदारीत आसा आनी स्टडी वेब्स ऑफ अॅक्टीव्ह लर्नींग फॉर यंग इन्स्पायरिंग माइंड्स (SWAYAM ) प्लॅटफॉर्मार क्रेडीट ट्रान्सफर पद्दतीन दिवपाचो प्रस्ताव आसा. विद्यार्थी ऑनलाइन शिकपाक शकतले अशें साबार अभ्यासक्रम उपलब्ध करपा खातीर भारत सरकारान सुरू केल्ली ही कार्यावळ. उच्च शिक्षण संस्था आनी उद्देग आनी संशोधन संस्थांतल्या तज्ञांच्या सहकार्यान उच्च दर्जाचे शिक्षणीक उपक्रम तयार करप हें हे कार्यावळीचें खाशेलपण आसा.
ह्या वेळार उच्च शिक्षण संचालक आनी कन्सोर्टियम फॉर अॅज्युकेशन कम्युनिकेशन हांचे मदीं समजीकाय करार जालो आनी ह्या कराराचो भाग म्हणून उच्च शिक्षण संचालनालयान संगीत आनी सीईसी- CEC खातीर अॅनालिटीकल रसायनशास्त्र अशे दोन ऑनलायन अभ्यासक्रम सुपूर्द केले.
ह्या वेळार सिईसीचे संचालक प्रो. जगतभूषण नड्डा, मुखेल सचीव पुनीत कुमार गोयल, सचीव (शिक्षण) रवी धवन, उच्च शिक्षण संचालक प्रसाद लोलयेंकार, MOOC नोडल अधिकारी डॉ. कविता अस्नानी आनी मानेस्त हजर आशिल्ले.
शिकपाची इत्सा आशिल्ल्या दरेका विद्यार्थ्या खातीर सरकार उच्च दर्जाचें शिक्षण उपलब्ध करून दितले. गोंय राज्याक प्रत्येक मळार स्वयंपूर्ण करपाचे आपले उद्दिश्ठ आसा. मागीर तें शेती, उद्देग वा शिक्षणीक मळ आसूं. मांडवी ह्या नव्या उपक्रमाचो गोंयांक नक्की फायदो जातलो आनी तरणाट्यांनी ह्या उपक्रमाचो योग्य उपेग करून आपलें ज्ञान आनी शिक्षणांत सुदारणा घडोवन हाडचीं.
– मुख्यमंत्री डॉ. प्रमोद सावंत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
