भांगरभूंय | प्रतिनिधी
सांगें ः गोंयचे नामनेचे नाट्यलेखक महेश चंद्रकांत नायक हांच्या ‘अॅक्टींग अॅक्टींग’ ह्या नाट्य पुस्तकाचे दुसरे आवृत्तीचें लोकार्पण हालींच जालें.
ज्येश्ठ नाट्यकर्मी सुरेश शांबा नायक तशेंच प्रकाशक सरिता नायक हांचे हस्तुकीं ह्या पुस्तकाचें प्रकाशन जालें. पणजेच्या अक्षरब्रह्म प्रकाशनाच्या सभाघरांत ह्या सुवाळ्याचें आयोजन केल्लें.
ह्या सुवाळ्याक माचयेर मुखेल सोयरे म्हणून ज्येश्ठ नाट्यकर्मी सुरेश शांबा नायक, डॉ. नविता नायक, दीपा मुरकुंडे आनी लेखक महेश चंद्रकांत नायक हांची उपस्थिती आसली. ज्येश्ठ कोंकणी लेखिका दीपा मुरकुंडे हांणी आपले विचार उक्तायतना लेखकाची तोखणाय केली. लेखकाक विनोदाची जाण आसा, ताका लागून ताचे लिखणेंतल्यान विनोदाचे प्रसंग येतात. तांणी अशे तरेचीं विनोदी कोंकणी नाटकां बरयत रावचीं आनी कोंकणी नाट्यसाहित्यांत भर घालची अशें आवाहन दीपा मुरकुंडे हांणी केलें.
कार्यावळीची सुरवात सौम्या नायक हांच्या गणेश वंदनान जाली. कार्यावळीचें सुत्रसंचालन रिया नार्वेकार हांणी केलें. मीना पेडणेकार हांणी येवकार दिलो जाल्यार शर्मिला कोलगांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
